Wes Streeting largohet nga qeveria britanike, Keir Starmer publikon letër falënderimi

Kryeministri britanik, Keir Starmer ka publikuar një letër falënderimi drejtuar ish-Sekretarit të Shëndetësisë Wes Streeting, pas largimit të tij nga qeveria.

Në letrën zyrtare të datës 14 maj 2026 nga 10 Downing Street, Starmer e falënderon Streeting për kontributin në rikthimin e Partisë Laburiste në pushtet dhe për reformat e realizuara në sistemin shëndetësor britanik.

Sipas kryeministrit, gjatë mandatit të Streeting janë ulur listat e pritjes në spitale, janë përmirësuar shërbimet e ambulancës dhe është rritur efikasiteti i NHS-së. Starmer vlerëson gjithashtu planin 10-vjeçar për shëndetësinë, reformat në kujdesin social dhe politikat për luftën kundër duhanit dhe sëmundjeve të rënda.

Në letër, Starmer pranon edhe sfidat politike pas rezultateve të vështira në zgjedhjet lokale, duke theksuar se Partia Laburiste duhet të vazhdojë të mbrojë vlerat dhe premtimet ndaj qytetarëve britanikë.

“Jam vërtet i keqardhur që nuk do të jesh më në tryezën e kabinetit,” shkruan Starmer, duke shtuar se Streeting do të vazhdojë të ketë një rol të rëndësishëm në parti edhe në të ardhmen.

Largimi i Streeting konsiderohet një zhvillim i rëndësishëm për qeverinë laburiste, ndërsa nuk janë dhënë ende detaje të plota mbi arsyet e dorëheqjes së tij.