Xhirimet arkivale rikthehen në Arkivin Qendror Shtetëror të Filmit pas më shumë se dy dekadash

Xhirimet arkivale nisën sërish në Arkivin Qëndror Shtetëror të Filmit, duke shënuar një hap të rëndësishëm në dokumentimin e jetës shqiptare dhe ruajtjen e kujtesës kolektive. Xhirimi i fundit arkival në AQSHF datonte në vitin 1999. Një ditë më parë nga AQSHF u bë me dije se xhirimet arkivale rinisën me faljen e Bajramit në Tiranë. “Xhirimi i sotëm dokumenton faljen e Bajramit në qendër të Tiranës si çast i rëndësishëm i jetës shpirtërore dhe sociale të vendit”, thuhet nga Arkivi Qëndror Shtetëror i Filmit.

Xhirimet arkivale janë pamje filmike ose video të ruajtura nga e kaluara, të cilat përdoren në dokumentarë, lajme, filma apo emisione për të sjellë dëshmi autentike të ngjarjeve, njerëzve dhe periudhave historike. AQSHF shprehet se ato dokumentojnë realitetin e një kohe të caktuar dhe mbeten një pasuri e çmuar për brezat që do të vijnë. Arkivi gjithashtu thekson se xhirimet arkivale janë të rëndësishme, sepse ruajnë kujtesën historike, kulturore dhe artistike të një shoqërie.

Ato shërbejnë si burim i vyer dokumentimi për ngjarje, tradita dhe zhvillimin e kinemasë, duke mbetur një referencë e rëndësishme për studiues, regjisorë dhe gazetarë. “Pse janë të rëndësishme për një arkiv filmi xhirimet arkivale? Sepse ruajnë kujtesën historike, kulturore dhe artistike të një shoqërie. Përmes tyre dokumentohen ngjarje, mënyra jetese, tradita dhe zhvillimi i kinemasë ndër vite.

Xhirimet arkivale shërbejnë gjithashtu si burim i vyer për studiues, regjisorë, gazetarë dhe për këdo që dëshiron të kuptojë dhe të rikthejë në vëmendje historinë tonë. Çdo javë, nga një punë e mirë për kujtesën filmike shqiptare dhe për Arkivin Qendror Shtetëror të Filmit. Urime për këtë punë të bukur regjisorit të ri D Haruni.”, thuhet nga AQSHF. Arkivi i Filmit në vendin tonë është kujdestari ligjor i prodhimit kinematografik shqiptar, kryesisht i përbërë nga produksionet nga një njësi e vetme shtetërore, Kinostudio “Shqipëria e Re”, e cila filloi aktivitetin e saj në vitin 1952 dhe u mbyll në vitin 1992.