YouTuber-ët hynë në aerodromin ushtarak të Batajnicës: “Ushtria u turpërua, duhet hetim”

Dy të rinj, të veshur me pantallona të shkurtra dhe bluza, hynë pa asnjë pengesë në aerodromin ushtarak “Pukovnik-pilot Milenko Pavlović” në Batajnicë dhe filmuan gjithçka, siç njofton gazeta serbe Danas. Videon e publikuan në kanalin “Roofless TV” në YouTube, ku brenda pak ditësh mblodhi më shumë se gjysmë milioni shikime.

Sipas përshkrimit të Danas-it, në pamje duket se si ata hyjnë në zonën e rrethuar, gjejnë avionë që me sa duket nuk përdoren më dhe futen brenda disa prej tyre, ndërsa filmojnë edhe uljen e një avioni. Nga policia dhe ushtria, pyetjes së gazetarëve se çfarë ka ndodhur dhe nëse kishin leje për xhirime, deri tani nuk ka asnjë përgjigje.

Novica Antiç, ish-kryetar i Sindikatës Ushtarake të Serbisë, tha për Danas-in se rasti tregon qartë gjendjen e ushtrisë. Sipas tij, kjo është pasojë e largimit masiv të njerëzve nga ushtria — në dekadën e fundit, 15.000 profesionistë kanë lënë Ushtrinë e Serbisë. “Sot nuk ka kush të ruajë objektet ushtarake. Kazermat janë bosh dhe prandaj na ndodhin këto turpe e skandale”, tha Antiç, duke shtuar se përgjegjësia bie edhe mbi drejtorin e Agjencisë së Zbulimit Ushtarak (VBA), Gjuro Jovaniç, shefin e Shtabit të Përgjithshëm Milan Mojsiloviç dhe të gjithë Shtabin e Përgjithshëm.

Eksperti i sigurisë Adam Kovaç tha se për një ndërhyrje të tillë do të mjaftonte një portier. “E pabesueshme është që hynë brenda pa asnjë kamuflazh dhe pa nevojë për t’u fshehur. Një pjesë e avionëve aty janë që nga Marrëveshja për kontrollin nënrajonal të armatimit të viteve ’90. Fakti që heshtin është turp — si të mos duan ta pranojnë se ndodhi. Duhet të ketë përgjegjësi institucionale. Nëse dikush ka dështuar në terren, ministria duhet të nisë hetimin”, tha Kovaç për Danas-in.

Petar Boshkoviç, ish-shef i Zyrës për marrëdhënie me publikun në Ushtrinë e Serbisë dhe deputet i partisë “Srbija Centar” (SRCE), e quajti rastin “turp të madh dhe tallje me ushtrinë”. Sipas tij, fillimisht investohet tek njerëzit dhe dinjiteti i tyre, pastaj tek teknika; ai kërkoi gjithashtu vendosjen e kontrollit demokratik dhe civil mbi ushtrinë, si dhe krijimin e ombudsmanit ushtarak për të ndalur mobingun në ushtri.