Zgjedhja e KLP, ambasada amerikane: Koha për të bërë historinë!
“Unë nuk dua t’i heq gjë këtij çasti me një fjalim të gjatë. Kjo është koha juaj për të votuar. Kjo është koha juaj për të bërë historine për Shqipërinë dhe botën. Kjo është koha juaj për t’i dhënë njerëzve të Shqipërisë sistemin e drejtësisë që meritojnë dhe që kërkojnë.
Shqipëria ka qenë në pritje të këtij çasti prej kohë të gjatë. Ju e keni pritur këtë. Shtetet e Bashkuara dhe Bashkimi Evropian e kanë ndihmuar Prokurorinë e Përgjithshme për rregullat e votimit dhe fletën e votimit; jemi të kënaqur që ky proces do të jetë i drejtë dhe profesional.
Si dhe dua që ta dini se Shtetet e Bashkuara janë me ju, se ju nuk jeni vetëm. Pasi të ngrini sot këtë Këshill, ne do t’ju ndihmojmë në punën tuaj. Ne gjithashtu do t’ju ndihmojmë të krijoni SPAK-un dhe BKH-në. Shtetet e Bashkuara i marrin shumë seriozisht reformat që po bën Shqipëria dhe jemi të kënaqur të festojmë arritjet tuaj të sotme”, tha Moses One në Mbledhjen e Zgjedhjes së Anëtarëve të Këshillit të Lartë të Prokurorisë.
***
11 dhjetori i 2018 do të shënohet në kalendar si një ditë kthesë në historinë e drejtësisë shqiptare, pasi mori jetë një ndër institucionet më të rëndësishme në kuadër të reformës në drejtësi; Këshilli i Lartë i Prokurorisë.
Pas shumë zvarritjesh, 295 prokurorë nga 305 në total, votuan këtë të martë dhe zgjodhën gjashtë anëtarët e Këshillit, cka i hap rrugë krijimit të Prokurorisë Speciale, një institucion që do të hetojë korrupsionin në nivele të lartë. Procesi i votimit nisi në orët e para të mëngjesit, për të përfunduar në mbrëmje vonë. Në garë për gjashtë vende, ishin 10 kandidatë nga të gjitha nivelet.Ndryshe nga sa thuhej nën ze, se mbledhja e përgjithshme e prokurorëve, mund të bojkotohej, në fakt ndodhi krejt ndryshe.
Prokurorët e Apeleve, Arben Dollapaj dhe Bujar Sheshi u shpallën automatikisht fitues, përderisa nuk kishin konkurentë në garë.
Më e etheshme ishte gara mes gjashtë kandidatëve të prokurorive të shkallëve të para, ku vetëm tre prej tyre do të mund të dilnin fitues. Mes tyre, më shumë vota grumbulluan Antoneta Sevdari, Gentian Osmani dhe Besnik Cani, duke zënë kështu tri vende në Këshill. Dritan Prenci, Besnik Muci dhe Vate Staka, nuk i bindën dot kolegët për ti votëbesuar si anëtarë të qeverisë së institucionit të akuzës.
Që nga ky moment posti i prokurorit të Përgjithshëm do të jetë honorifik, pasi njerëzit e akuzës do t’i japin llogari përpara Këshillit të Lartë të Prokurorisë.
Pasi të konstituohet, një nga detyrat parësore, që Këshilli duhet të përmbushë është hapja e garës për prokuror të përgjithshëm, post që mbahet përkohësisht prej një viti nga Arta Marku.
