Zgjedhjet në PD, Berisha: Kandidimi i Mereme Selës do ta bënte garën qesharake. Salianji ka bashkëpunuar me eksponentë të krimit

Sali Berisha do të jetë kandidati i vetëm në garën për kreun e Partisë Demokratike, ndërsa ka sqaruar në një konferencë për shtyp përjashtimin e kandidaturave të tjera. Për Mereme Selën, Berisha u shpreh se ajo nuk plotësonte kriteret dhe se një garë e tillë do të ishte “qesharake” dhe do të dëmtonte seriozitetin e procesit zgjedhor brenda PD-së.

“Për të kandiduar Meremja që të drejtojë demokratët, duhet të ketë disa prova të tjera sepse përndryshe gara bëhet qesharake. Një garë e tillë nuk të nderon”, deklaroi ai, duke shtuar se Komisioni përkatës kishte vendosur se kandidatja nuk i përmbush kriteret.

Ndalur te Salianji, Berisha ngriti akuza ndaj tij, duke pretenduar se ai ka pasur kontakte me eksponentë të krimit të organizuar. Sipas Berishës, këto veprime bien ndesh me qëndrimet e Partisë Demokratike.

“Ndërkohë informacione të verifikuara, ky në burg drekonte dhe darkonte me Pëllumb Gjokën dhe Oltion Bistrin. Ky ishte opozita, ata byrazerë të qeverisë. Por kjo është 100% e vërtetë. Pastaj gjatë verës, shkonte te Ergys Agasi. Ky ishte njeriu që unë sulmoja më shumë. Ergys Agasi mblidhte Suel Çelën dhe Elvis Doçin dhe aty bëheshin planet si të grabiteshin votash. Unë i denoncoja çdo ditë, ky tani gjeti të ulet me Ergys Agasin. Ne mbajtëm heshtje deri sa doli raporti i OSBE ODIHR. Doli raporti, menjëherë kam thirrur mbledhjen e kryesisë. Ishte edhe Salianji, shumë mirë tha. E thirra të pasnesërmen, i thash më thuaj çfarë mendon, çfarë aksionesh duhet të ndërmarrim. Nuk më tha gjë, iku. Pastaj thërret më të votuarit, i shkojnë. Vazhdon nis takimet. I them nuk janë të partisë sepse mblodhi ata që punuan kundër në fushatë. Patëm njerëz që na punuan kundër. Unë i kam shkruar e ke përjashtuar veten nga PD sepse beteja jonë me krimin e organizuar është e përjetshme”, u shpreh Berisha.