Zhvillohet në mungesë gjyqi për Almir Dacin, babai: Iku në Siri se mbeti pa bukë
Zhvillohet për herë të parë në Gjykatën e Krimeve të Rënda seanca ndaj imamit Almir Daci, i cili konsiderohet si një nga drejtuesit më të pushtetshëm të celulave të luftëtarëve xhihadistë në Siri.
Daci, imami i xhamisë së Leshnicës së Pogradecit nuk ndodhet në Shqipëri dhe është shpallur në kërkim. Si pasojë e kësaj, ai po gjykohet në mungesë. Ditën e sotme, babai i Dacit, Xhevahiri është marrë në pyetje nga trupi gjykues. Ky i fundit ka mohuar akuzat e Prokurorisë, duke thënë se i biri nuk ka shkuar në Siri për të luftuar.
“Djali im nuk ka shkuar në Siri për të luftuar. Ai ka qenë imam në xhaminë e Leshnicës, por e hoqën sepse nuk e fali namazin e Bajramit në kohën e duhur. Ai mbeti i papunë dhe pa bukë. Kështu që u detyrua të shkojë në Siri”, tha Xhevahir Daci përpara trupit gjykues.
Babai shtoi gjithashtu se me djalin e tij ka folur për herë të fundit në dhjetor të 2015. Almir Daci, njihet si një nga personat më të rrezikshëm që i janë bashkuar ISIS-it. Disa muaj më parë ai publikoi një video në Youtube , ku së bashku me një militant nga Kosova kërcënuan me sulme terroriste kundër të gjithë atyre që nuk e përkrahin kauzën e tyre, çka përbëri edhe provën më të fortë për përfshirjen e tij në terrorizëm. Ndaj tij rëndojnë akuza si pjesëmarrje në luftë, thirrje dhe nxitje e urrejtjes, pjesë e ISIS.
