ZJARRET AKTIVE NË DISA ZONA, ULQINI KËRKON NDIHMË NGA AJRI

_{Foto: Shutterstock}

Zjarret vazhdojnë të jenë aktive në disa komuna të Malit të Zi. Në Ulqin, Shërbimi për Mbrojtje dhe Shpëtim ka kërkuar angazhimin e mjeteve ajrore për shuarjen e zjarrit në Shas.

Sipas Ministrisë së Punëve të Brendshme, zjarre aktive ka edhe në Podgoricë, Cetinë, Nikshiq, Kollashin dhe Plavë, si dhe në zonën e Ulqinit, ku përveç Shasit është aktiv edhe zjarri në VLladimir.

Disa vatra në Pluzhinë, Shavnik dhe Danillovgrad janë nën kontroll.

Gjatë ditës së hënë, dy avionë Air Tractor realizuan 24 fluturime dhe hodhën rreth 72 tonë ujë, ndërsa avioni Antonov kreu pesë fluturime dhe hodhi edhe 40 tonë ujë mbi zonat e përfshira nga zjarret.

Autoritetet kanë bërë të ditur se ekipet në terren po vazhdojnë angazhimin intensiv, ndërsa situata po monitorohet vazhdimisht për të mbrojtur banorët, pronën dhe pasuritë natyrore.