Zjarri në Fier, Ministria e Shëndetësisë: 3 persona të asfiksuar nga tymi, ekipet shëndetësore në gatishmëri

Ministria e Shëndetësisë ka dalë me një deklaratë zyrtare në lidhje me situatën nga zjarri në Fier, ku njofton se deri më tani 3 persona janë paraqitur me gjendje asfiksie nga tymi.

Tre personat kanë marrë menjëherë ndihmën e nevojshme shëndetësore, ndërsa ekipet shëndetësore vijojnë të jenë në terren dhe në gatishmëri të plotë për t’iu përgjigjur çdo nevoje apo emergjence shëndetësore.

Në terren janë angazhuar 9 mjekë dhe infermierë të Qendrës Shëndetësore Levan, si dhe dy autoambulanca me personel shëndetësor nga Spitali Rajonal Fier.

Njëra autoambulancë është e stacionuar në Levan, ndërsa tjetra është në gatishmëri për ndërhyrje sipas nevojës.

Për çdo rast të mundshëm të urgjencës kardiake, është koordinuar trajtimi pranë Spitalit Memorial Fier, për të garantuar ndërhyrje të shpejtë dhe të specializuar.

Strukturat shëndetësore vijojnë monitorimin e pandërprerë të situatës dhe mbeten në gatishmëri të plotë për t’iu përgjigjur çdo nevoje të qytetarëve.