“Zvërneci”/ Rama: Nuk do të ketë projekte kundër natyrës, ligji i ri sipas standardeve të BE-së

Kryeministri Edi Rama ka mbrojtur projektet e parashikuara për zhvillimin turistik në zonën e Zvërnecit gjatë një bashkëbisedimi me gazetarë të Bashkimit Evropian. Kreu i qeverisë hodhi poshtë pretendimet se investimet e huaja në infrastrukturën hoteliere të luksit do të shkaktojnë dëme mjedisore, duke cituar emrat e disa prej rrjeteve më të njohura ndërkombëtare që kanë shfaqur interes për tregun shqiptar.

Sipas kreut të ekzekutivit, profilet e korporatave të interesuara shërbejnë si garanci për ruajtjen e ekosistemit lokal.

Gjatë fjalës së tij, kryeministri argumentoi se filozofia e bizneseve të përfshira bazohet në integrimin me mjedisin dhe jo në tjetërsimin e tij. Ai renditi markat ndërkombëtare për të ilustruar standardet e mbrojtjes mjedisore që ato aplikojnë:

“Qëkur keni parë në Evropë projekte që vijnë si grusht kundër natyrës? Mendoni që Cheval Blanc dhe Bernard Arnault do të vrasin flamingot? Mendoni që Rosewood Hotel do të vijë këtu për të shitur ‘Mojito’ në mes të betonit? Mandarin Oriental do të dojë të lidhet me diçka që është e shëmtuar? Hotelet Aman do të vijnë të qëndrojnë mes bunkerësh?”

Ndryshimet ligjore dhe standardet e Bashkimit Evropian

Një pikë tjetër kyçe e adresuar ishte edhe fati i kuadrit ligjor aktual për investimet në vend. Kryeministri bëri të ditur se ligji ekzistues për investimet strategjike do të zëvendësohet me një mekanizëm të ri ligjor, i cili po hartohet në përputhje me direktivat e Bashkimit Europian.

Sa i përket ndryshimit të legjislacionit dhe harmonizimit me rregullat e Brukselit, kreu i qeverisë saktësoi pozicionin institucional:

“Ligji për investimet strategjike kurrë nuk ka për të qenë i padrejtë. Gjëja e mirë është që do ta lëmë jashtë sepse e ka përmbushur misionin e vet. Po punojmë për një ligj të ri për investimet. Çdo gjë që bëjmë mbështetet te standardet e BE dhe kjo është mjaft e qartë. Nuk ka diçka të tillë si aktivitete që dëmtojnë mjedisin. S’mund të ndodhin sepse duhet të jemi në përputhje me standardet e BE.”

Në mbyllje të argumentit të tij, Rama theksoi se konkurrueshmëria e Shqipërisë në tregun ndërkombëtar të turizmit varet pikërisht nga ruajtja e aseteve natyrore, duke e cilësuar zhvillimin e qëndrueshëm si të vetmen rrugë përpara për ekonominë e vendit.