13 milionë euro kredi për rimorkiator dhe avion zjarrfikës: Ministria e Financave negocion me Erste Bank

Ministria e Financave e Malit të Zi do t’i vazhdojë negociatat me Erste Bank për mbylljen e një kredie prej 13 milionë eurosh, të destinuar për blerjen e një rimorkiatori për nevojat e Administratës Portuale, përkatësisht të një avioni tjetër zjarrfikës të tipit “Air Tractor AT-802” për Njësinë Avio-Helikopterike të Ministrisë së Punëve të Brendshme, siç njofton Vijesti.

Ky është rezultati i procesit që e nisi së fundmi Ministria e Financave, e cila kontaktoi të njëmbëdhjetë bankat tregtare vendase duke u kërkuar të dorëzojnë oferta për këtë kredi. Nga nëntë ofertat e mbërritura, Ministria i veçoi si më të favorshme ofertat e Bankës Tregtare Malazeze (CKB) dhe të Erste Bank dhe i ftoi t’i rishikojnë ato. Sipas Informacionit që Qeveria e miratoi të mërkurën e kaluar, CKB nuk dorëzoi ofertë të re, ndërsa Erste ofroi kredi prej tetë milionë eurosh për rimorkiatorin dhe pesë milionë eurosh për avionin zjarrfikës, me afat shlyerjeje prej 60 muajsh dhe kamatë fikse prej katër për qind, përkatësisht kamatë variabile të bazuar në Euriborin tremujor plus 1,6 për qind, si dhe tarifë përpunimi prej 0,1 për qind dhe shlyerje gjashtëmujore, shkruan Vijesti.

Në Informacion është përcaktuar se Ministria e Financave do ta informojë Qeverinë për kushtet përfundimtare të marrëveshjes dhe do t’ia dorëzojë asaj kontratat e dakorduara të kredisë për shqyrtim dhe pranim.

Blerja e rimorkiatorit shumëfunksional është, sipas Qeverisë, me rëndësi të veçantë për përmirësimin e sigurisë së lundrimit në Gjirin e Bokës së Kotorrit dhe për sigurimin e asistencës së besueshme anijeve gjatë hyrjes, daljes, manovrimit dhe tranzitit nëpër gji. Vënia e tij në funksion do t’i përmirësojë edhe kapacitetet për veprim në situata emergjente, veçanërisht në rast zjarri në anije, derdhjeje nafte në det dhe nevoje për evakuimin e njerëzve, duke kontribuar kështu në mbrojtjen e jetëve njerëzore, të mjedisit detar dhe të infrastrukturës portuale.

Qeveria në korrik miratoi Informacionin për nevojën e blerjes së rimorkiatorit për Gjirin e Bokës dhe e ngarkoi Administratën e Sigurisë Detare që, në emër dhe për llogari të Administratës Portuale të sapoformuar, ta kryejë blerjen me procedurë urgjente. Vlera e planifikuar e rimorkiatorit është 6.611.570 euro, ndërsa TVSH-ja që duhet paguar për të është 1.388.430 euro. Ligji i ri për sigurinë e lundrimit detar e ka bërë të detyrueshëm shoqërimin me rimorkiator për kapitenët e anijeve me gjatësi 100 metra e më shumë gjatë lundrimit nëpër ngushticën e Veriges, si dhe gjatë manovrimit në portet e Gjirit të Bokës.