3 ciklone kërcënojnë Hawaiin, El Niño më i fortë se kurrë, shkencëtarët paralajmërojnë për skenarin më të keq

Dy ciklone të forta dhe një stuhi tropikale që po forcohet me shpejtësi u regjistruan në Oqeanin Paqësor të mërkurën. Ujërat e Paqësorit po ngrohen në mënyrë dramatike për shkak të fenomenit El Niño, i cili parashikohet të ketë një forcë historike këtë vit.

Uraganet Lowell dhe Karina, të dy të klasifikuar si uragane shkatërruese të Kategorisë 4, pritet të vazhdojnë të lëvizin shumë larg brigjeve të Havait, tha Qendra Kombëtare e Uraganeve (NHC) e SHBA-së.

Megjithatë, trajektoret e tyre mbeten të pasigurta. Ekziston ende një mundësi serioze për erëra më të forta dhe reshje të dendura shiu që mund të godasin këtë arkipelag amerikan.

Situata ndërlikohet edhe më tej nga fakti se Hawaii është ende duke u rikuperuar nga Cikloni Lala, i cili përshkoi zonën me vrull në mesin e gushtit dhe shkaktoi përmbytje të mëdha.

Ciklonet Lovell dhe Karina ndiqen nga afër nga stuhia tropikale Maria. Ajo ndodhet vetëm pak kilometra larg bregdetit meksikan dhe, sipas vlerësimeve të NHC-së, pritej të shndërrohej në ciklon të mërkurën vonë.

“El Niño krijon kushte jashtëzakonisht të favorshme për këto stuhi, sepse ato ushqehen kryesisht nga ujërat e ngrohta”, shpjegoi për AFP-në Julia Cole, një klimatologe nga Universiteti i Miçiganit.

Ajo shtoi se një seri e tillë prej tre stuhish të njëpasnjëshme është “padyshim e rrallë” . Le t’ju kujtojmë se në vitin 2015, u regjistruan katër ciklone njëri pas tjetrit, dhe ai vit u shënua nga një El Niño shumë i fortë.

“Sistemi klimatik në fakt është ngrohur intensivisht për rreth njëzet vjet”, thekson Benjamin Kirtman nga Universiteti i Miamit, duke theksuar se temperaturat e ujërave sipërfaqësore tashmë kanë arritur nivele pothuajse rekord.

Sipas të dhënave nga Agjencia Kombëtare Amerikane e Kërkimeve Oqeanike dhe Atmosferike (NOAA), shanset që ky El Niño të jetë më i forti në histori vlerësohen në 69 përqind . Ky fenomen tashmë po shkakton gjerësisht mot ekstrem në të gjithë botën dhe pritet të arrijë kulmin në nëntor.

Ky fenomen klimatik, i cili ndodh në cikle nga dy deri në shtatë vjet, ndodh kur erërat lindore, të cilat në kushte normale i mbajnë ujërat e ngrohta në Oqeanin Paqësor perëndimor, dobësohen përkohësisht, duke lejuar që uji i ngrohtë të rrjedhë drejt lindjes.

Kur temperaturat sipërfaqësore mbeten mbi normalen për muaj të tërë, ato shkaktojnë stuhi të forta jashtë atij rajoni, me pasoja për të gjithë atmosferën e Tokës. Për shkak të kësaj, klima bëhet më e ngrohtë dhe më e thatë në disa pjesë të planetit, ndërsa në të tjera bëhet dukshëm më e ftohtë dhe më e lagësht.