6 të plagosur pas shpërthimit të një makine-bombë përpara stacionit të policisë në Meksikë

Një makinë-bombë shpërtheu përpara një stacioni policie në Meksikë të dielën në mbrëmje, duke plagosur gjashtë persona, thanë autoritetet.

Shpërthimi ndodhi në qytetin Ojocaliente në Zacatecas, një shtet me rrugë kyçe për trafikimin e drogës.

“Eksplozivi u vendos në një automjet privat dhe shkaktoi dëme fizike në stacion dhe pronat që ndodheshin aty pranë”, tha sekretari i qeverisë së shtetit, Rodrigo Reyes, në një postim në Facebook.

“Raportohet se gjashtë civilë janë plagosur, të cilët po marrin kujdes mjekësor”, tha ai në një postim të mëparshëm.Zacatecas është një zonë kyçe për tregtinë e drogës sepse lidh Meksikën qendrore me veriun dhe perëndimin e vendit dhe përmban rrugë që janë çelësi për kontrabandën e kokainës dhe narkotikëve të tjerë në Shtetet e Bashkuara.

Dhuna e tmerrshme e shkaktuar nga droga e ka pllakosur shtetin për vite me radhë, me trupa që shfaqeshin dhe njerëz të zhdukur pothuajse çdo ditë, derisa u vendos qetësia relative.

Por në korrik, pesë trupa u shfaqën të varur nga një urë në qytetin Pozos de Gamboa, rreth 75 kilometra nga Ojocaliente.

Viktimat përfshinin një ish-kryetar bashkie, nëpunës civilë dhe biznesmenë nga pjesë të tjera të shtetit.