Bota

SHBA: Fitorja në Arizona i vendos demokratët vetëm një vend larg kontrollit të Senatit

Marrë nga Associated Press

Senatori demokrat Mark Kelly fitoi rizgjedhjen të premten në shtetin vendimtar të Arizonës, duke mundur republikanin Blake Masters, duke bërë kështu që partia e tij të jetë vetëm një vend larg marrjes së kontrollit të Senatit për dy vitet e ardhshme të mandatit të presidentit Joe Biden.

Me votën e nënpresidentes Kamala Harris, demokratët mund të ruajnë kontrollin e Senatit duke fituar ose garën në Nevada, e cila nuk është përcaktuar ende, ose balotazhin e muajit të ardhshëm në Xhorxhia. Me fitoren e demokratëve në Arizona, republikanëve tani u duhet të fitojnë të dyja garat e mbetura për të marrë shumicën.

Rezultati i Arizonës është një tregues i forcimit të pozitave të demokratëve në një shtet dikur mbizotërohej bindshëm nga republikanët.

Edhe gara për postin e guvernatorit mes demokrates Katie Hobbs dhe republikanes Kari Lake nuk është përcaktuar.

Zoti Kelly, një ish-astronaut i NASA-s është i martuar me ish-anëtaren e Dhomës së Përfaqësuesve Gabby Giffords, e cila frymëzoi vendin kur u rimëkëmb pasi u plagos në kokë nga një sulm me armë zjarri në një atentat në vitin 2011 ku gjetën vdekjen gjashtë persona dhe u plagosën 13. Zoti Kelly dhe zonja Giffords bashkë-themeluan një organizatë për sigurinë e armëve.

“Ka qenë një nga nderet e mëdha të jetës sime të shërbeja si Senator i Arizonës,” tha zoti Kelly në një deklaratë. “Jam i përulur nga besimi që tregoi shteti ynë ndaj meje për të vazhduar këtë punë.”

Fitorja e zotit Kelly në zgjedhjet e posaçme të 2020-ës, që u mbajtën pas vdekjes së senatorit republikan John McCain u dha demokratëve të dy vendet e Arizonës në Senat për herë të parë në 70 vjet. Kthesa ishte rezultat i ndryshimeve demografike dhe pakënaqësive ndaj ish-presidentit Donald Trump.

Fushata e demokratit Kelly u përqendrua kryesisht në mbështetjen e tij për të drejtat e abortit, mbrojtjen e Sigurimeve Shoqërore, uljen e çmimeve të barnave dhe sigurimin e një furnizimi të qëndrueshëm me ujë në mes të një thatësire shkaktuar nga rënia e nivelit të ujit në lumin e Kolorados.

Ndërsa mbështetja për presidentin Biden binte zoti Kelly u distancua prej tij, veçanërisht në lidhje me sigurinë kufitare, dhe nuk e vuri shumë thekson tek përkatësia e tij demokrate mes ankthit për gjendjen e ekonomisë.

Zoti Masters në fushatën e tij, bëri thirrje për privatizimin e Sigurimeve Shoqërore, mbajti një qëndrim të ashpër kundër abortit dhe ngulmoi tek një teori raciste e përqafuar nga nacionalistët e bardhë sipas së cilës demokratët po kërkojnë të përdorin imigracionin për të zëvendësuar të bardhët në Amerikë.

Ai fitoi mbështetjen e zotit Trump duke mbështetur pretendimimin pa baza të ish-presidentit se ai kishte fituar në zgjedhjet e vitit 2020, por nën presion gjatë një debati muajin e kaluar, ai pranoi se nuk kishte parë prova që zgjedhjet ishin manipuluar. Ai më pas iu rikthye edhe më me forcë pretendimit të rremë për fitoren e zotit Trump.

Related Articles

Leave a Reply

Your email address will not be published. Required fields are marked *

Back to top button