A ia nxori “sekretin” AKI-së Auditorja? Dyshime për certifikatat e sigurisë së raportit për digat

Raporti i Zyrës Kombëtare të Auditimit për sigurinë e digave është klasifikuar me nivelin “I Kufizuar”, ndërsa institucionet nuk po tregojnë nëse personat që e hartuan, rishikuan dhe pranuan dokumentin i plotësonin kushtet e sigurisë, sipas hetimit të ri të emisionit Kiks Kosova në Klan Kosova.

Auditorja e Përgjithshme, Vlora Spanca, në qershor konfirmoi se auditimi kishte përfunduar, por raporti nuk do të publikohej. “Sot kemi finalizuar raportin e auditimit ‘Monitorimi, mirëmbajtja dhe siguria e digave në Kosovë’. Ky raport i auditimit nuk do të publikohet, por vetëm i është dërguar palëve audituese përgjegjëse për zbatimin e rekomandimeve të auditimit”, kishte thënë ajo.

Sipas Spancës, publikimi i të dhënave mund të cenonte sigurinë e infrastrukturës vitale dhe të ekspozonte dobësi që mund të rrisnin rrezikun për sigurinë publike. Ajo tha se vendimi ishte marrë duke u bazuar në legjislacionin për informacionin e klasifikuar dhe pas rekomandimeve të organeve kompetente të sigurisë, duke falënderuar Agjencinë Kosovare për Inteligjencë dhe Agjencinë për Mbrojtjen e Informacionit të Klasifikuar për mbështetjen në këtë proces.

Megjithatë, përgjigjja e Agjencisë për Mbrojtjen e Informacionit të Klasifikuar (AMIK) hapi një çështje tjetër: kush ka pasur të drejtë ta shohë raportin. AMIK konfirmoi se drejtuesit e institucioneve të pavarura, përfshirë ZKA-në, kanë kompetencë ligjore për klasifikimin e informacionit — por sqaroi se personat që kanë qasje në informacion të klasifikuar duhet t’i plotësojnë kushtet e përcaktuara me Ligjin për Mbrojtjen e Informacionit të Klasifikuar, përfshirë pajisjen me Certifikatë të Sigurisë së Personelit kur kërkohet për nivelin përkatës të klasifikimit, si dhe respektimin e parimit të “Nevojës për të ditur”.

Sipas burimeve të mirëinformuara të Kiks Kosova, auditorët që kanë punuar në hartimin e raportit dhe personat që e kanë rishikuar atë nuk kanë pasur certifikata sigurie. Kiks Kosova e pyeti AMIK-un nëse ZKA-ja kishte kërkuar konsultim për klasifikimin e raportit dhe nëse Agjencia kishte dhënë rekomandim, vlerësim apo opinion — pyetje të cilave AMIK nuk iu përgjigj.