A24 mposht Warner Bros.-in dhe Paramount-in në box office-in e verës — e para studio e pavarur që ia del

Sipas të dhënave të raportuara nga The Hollywood Reporter, studioja e pavarur A24 e mbylli sezonin veror të kinemave amerikane me 5.5% të box office-it domestic, duke lënë pas dy gjigantë të Hollywood-it, Warner Bros.-in (5%) dhe Paramount-in (4.5%). Është hera e parë në histori që një distributor i pavarur e përfundon verën para një studioje të “Big Five”.

Të dhënat e Deadline-it për renditjen verore (periudha 1 maj – 7 shtator) tregojnë se A24 grumbulloi rreth 244 milionë dollarë në SHBA, përpara Warner Bros.-it (239.3 milionë) dhe Paramount-it (219.8 milionë). Verën e kryesoi Universal me 1.23 miliardë dollarë, e ndjekur nga Disney (1.034 miliardë), Sony (1 miliard) dhe Lionsgate (270 milionë) — ndërsa sezoni veror si i tërë theu rekordin absolut me 4.76 miliardë dollarë të arkëtuar brenda vendit.

Përgjegjësi kryesor i këtij suksesi ishte horrori “Backrooms”, i regjisorit vetëm 20-vjeçar Kane Parsons, i bazuar në web-serinë e tij virale për hapësira liminale pa fund. Filmi, i xhiruar me një buxhet prej vetëm 10 milionë dollarësh, u hap me 81 milionë dollarë në SHBA — hapja më e madhe në historinë e A24 — dhe ka kaluar shifrën e 400 milionë dollarëve në mbarë botën, duke u shndërruar në publikimin më fitimprurës në historinë e studios.

Ndërkohë, gjigantët e industrisë përjetuan një verë të vështirë. Warner Bros. ra me 76% krahasuar me verën e vitit 2025, kur filmat “Superman”, “Weapons” dhe “F1” e çuan në vendin e dytë të renditjes. Filmi më i suksesshëm i verës për Paramount ishte “Scream 7”, me rreth 122 milionë dollarë të arkëtuar në SHBA.

Vera i takoi edhe një tjetër suksesi mikro-buxhetor: horrorit “Obsession” (750 mijë dollarë kosto prodhimi) të regjisorit 26-vjeçar Curry Barker, i cili fitoi 263.4 milionë dollarë brenda vendit dhe kaloi 516 milionë dollarë në gjithë botën.

Burimi: The Hollywood Reporter, Deadline — lexo artikullin origjinal