Akademia përkujtimore për Afrim Bunjakun: Kurti kërkon drejtësi për Radoiçiqin, Haxhiu thotë se Policia parandaloi aneksimin e veriut

Sonte (24 shtator 2026) në Sallën e Kuqe të Pallatit të Rinisë në Prishtinë u mbajt akademia përkujtimore në shënim të trevjetorit të rënies në krye të detyrës të rreshterit të Policisë së Kosovës, Afrim Bunjaku, i vrarë më 24 shtator 2023 në Banjskë gjatë sulmit të një grupi paramilitar serb të udhëhequr nga Millan Radoiçiq.

Kryeministri Albin Kurti tha se agresioni i 24 shtatorit 2023 ishte një përpjekje e mbështetur nga Serbia për të cenuar sovranitetin dhe integritetin territorial të Kosovës: “Sulmi paramilitar i 24 shtatorit në Banjskë tri vite më parë, u bë nga një grup terroristësh të mbështetur e financuar, trajnuar dhe instruktuar nga shteti i Serbisë, udhëhequr nga Millan Radoiçiq.”

Kurti theksoi: “Tre vite nga sulmi i Banjskës, Millan Radoiçiq dhe pjesëtarët e tjerë të grupit terrorist paramilitar, vazhdojnë të strehohen nga presidenti i Serbisë, teksa i ofron mbrojtje dhe shërbime. Ata duhet të përballen me drejtësinë në Kosovë dhe të gjykohen për sulmin me përmasa ushtarake të organizuar ndaj shtetit tonë dhe vrasjen e Afrim Bunjakut. Ne nuk do të ndalemi derisa të ketë drejtësi.”

Ushtruesja e detyrës së presidentes, Albulena Haxhiu, kujtoi se synimi i sulmit nuk ishte vetëm ndaj policisë: “Synimi nuk ishte vetëm sulmi ndaj Policisë së Kosovës, por shkëputja e një pjese të territorit të Republikës së Kosovës dhe bashkimi i saj me Serbinë. Këtë synim e ka konstatuar këtë vit edhe Gjykata Themelore në Prishtinë përmes aktgjykimit në rastin Banjska.”

Haxhiu shtoi: “Përpjekja për shkëputjen dhe aneksimin e veriut dështoi falë guximit, falë profesionalizmit dhe falë vendosmërisë së Policisë së Kosovës”, duke kujtuar se Bunjaku kishte 22 vjet përvojë në polici dhe 16 vjet shërbim si rreshter.

Burimi: KosovaPress