Aksident i rëndë në autostradën “Princesha Ksenija”: humb jetën një 19-vjeçare, një person tjetër i plagosur

Një aksident i rëndë trafiku ka ndodhur sot pasdite në autostradën “Princesha Ksenija” në Mal të Zi, në vendin Suka, ku një 19-vjeçare ka humbur jetën, ndërsa një person tjetër ka mbetur i plagosur, siç njofton Vijesti.

Sipas të dhënave të para të policisë, aksidenti ka ndodhur rreth orës 14:25 dhe në të ka qenë e përfshirë vetëm një automjet udhëtarësh. Personi i plagosur është transportuar në Qendrën Klinike të Malit të Zi (KCCG) për t’iu dhënë ndihma mjekësore, ka bërë të ditur Drejtoria e Policisë për Portalin e RTCG-së.

“Rrethanat e sakta të ngjarjes do të përcaktohen pas këqyrjes së vendit të ngjarjes, e cila është në vazhdim”, ka njoftuar Drejtoria e Policisë, ndërsa me rastin po merret Prokuroria Themelore Shtetërore në Podgoricë.

Për shkak të aksidentit, qarkullimi në drejtimin nga Kollashini drejt Podgoricës ka qenë i ndërprerë për më shumë se një orë e gjysmë. Sipas raportimit të RTCG-së, qarkullimi në autostradë u rivendos rreth orës 16:00, pas përfundimit të këqyrjes në vendin e ngjarjes.