Aksidenti në Durrës, Balla kërkon shtyrjen e ndryshimeve në Kodin Rrugor

Duke folur gjatë seancës plenare të kësaj të enjte në Kuvendin e Shqipërisë, kreu i Grupit Parlamentar të Partisë Socialiste, Taulant Balla, kërkoi shtyrjen e diskutimit për ndryshimet në Kodin Rrugor, me qëllim shqyrtimin më të thelluar të amendamenteve të propozuara.

Balla u shpreh se, pas ngjarjes së rëndë të ndodhur në Durrës, ku humbën jetën dy fëmijë, dy deputetë të PS kanë depozituar disa ndryshime ligjore që synojnë forcimin e masave parandaluese ndaj drejtuesve të mjeteve të papërgjegjshëm.

Sipas tij, këto propozime kanë nevojë të diskutohen më gjerësisht dhe të merren në konsideratë edhe nga opozita, për të arritur një konsensus sa më të gjerë në Kuvend.

“Nisur nga diskutimet që bëmë ditën e hënë, deputetë të PS kanë propozuar disa amendamente me fokus masat parandaluese ndaj drejtuesve të papërgjegjshëm dhe kërkojmë shtyrjen e diskutimit të kësaj çështjeje, me qëllim që të kemi konsensusin e duhur,” u shpreh Balla gjatë fjalës së tij.

Ai theksoi gjithashtu se qëllimi është që edhe deputetët e Partisë Demokratike të kenë kohë për të shqyrtuar ndryshimet dhe për të kontribuar në mënyrë konstruktive në përmirësimin e Kodit Rrugor.