Aksion i madh policor në Kumanovë: bastisje në disa lokacione kundër një grupi të dyshuar për zhvatje, fajde dhe pastrim parash

Prani e shtuar policore dhe bastisje në disa lokacione janë parë mëngjesin e sotëm në Kumanovë, në kuadër të një aksioni të madh të Ministrisë së Punëve të Brendshme për goditjen e një grupi të organizuar kriminal, siç njofton Fokus.

Sipas informacioneve jozyrtare që i përcjell Fokus, grupi dyshohet se për një periudhë të gjatë ka vepruar në Kumanovë dhe më gjerë, duke u marrë me zhvatje, fajde, pastrim parash, kërcënime dhe shantazhe. Po ashtu jozyrtarisht, si organizator i grupit dyshohet një person i njohur me nofkën “Shtuka”, ndërsa gjatë bastisjeve të deritanishme janë gjetur para, automjete dhe dokumentacion.

Aksionin e zbaton Departamenti për Luftimin e Krimit të Organizuar dhe Korrupsionit, në koordinim me Prokurorinë për Ndjekjen e Krimit të Organizuar dhe Korrupsionit, dhe ai vjen pas një procedure më të gjatë hetimore. Përveç objekteve të lidhura me të dyshuarit, siç njofton Fokus, po kontrollohen edhe një zyrë noterie dhe një këmbimore, për lidhje të mundshme me aktivitetet që po hetohen.

Prokuroria Themelore Publike për Ndjekjen e Krimit të Organizuar dhe Korrupsionit konfirmoi se një prokuror publik po koordinon veprimet e policëve të Departamentit për Luftimin e Krimit të Organizuar dhe të Serioz të MPB-së. Mbi bazën e urdhrave të siguruara nga prokuroria kompetente, po kryhen disa bastisje për sigurimin e provave në lidhje me veprat penale “zhvatje”, “pastrim i parave dhe i të ardhurave të tjera nga vepra penale” dhe “punë e pandërgjegjshme në shërbim”.

Nga Prokuroria njoftojnë se detaje të tjera do të bëhen të ditura pas përfundimit të plotë të aksionit.