Aktori i “Top Gun: Maverick” gjendet i vrarë në shtëpi. Arrestohet djali i partneres: Ishte njeriu i mëkatit!

Aktori amerikan James Handy, i njohur për rolet në filma si “Top Gun: Maverick”, “Jumanji” dhe “Logan”, është gjetur i vdekur në shtëpinë e tij në Los Angeles, pas një sulmi me thikë që dyshohet se është kryer nga djali i të dashurës së tij.

Sipas Departamentit të Policisë së Los Angeles-it, aktori 81-vjeçar u gjet në oborrin e përparmë të banesës së tij në Tarzana, Kaliforni, rreth orës 09:30 të mëngjesit të së mërkurës. Ai ishte pa ndjenja dhe kishte disa plagë me thikë në kraharor.

Pas ngjarjes, autoritetet arrestuan 44-vjeçarin Michael Gledhill, djalin e partneres së aktorit, i cili është akuzuar për vrasje. Për të është vendosur një garanci prej 2 milionë dollarësh.

Sipas policisë, gjatë një telefonate në numrin e emergjencës 911, i dyshuari ka deklaruar: “Unë jam biri i atij burrit, sapo vrava njeriun e mëkatit.” Kur forcat e rendit mbërritën në vendngjarje, ai u ka thënë oficerëve se ishte personi që po kërkonin.

The Guardian shkruan se hetimet e para tregojnë se i dyshuari jetonte në të njëjtën banesë me nënën e tij, e cila ishte në një marrëdhënie me viktimën.

James Handy, i lindur në New York City, kishte një karrierë të gjatë në televizion dhe film, e cila nisi në vitin 1977 me serialin “Ryan’s Hope”.

Gjatë karrierës së tij ai u shfaq në prodhime të njohura si “Law & Order”, “NCIS: Los Angeles” dhe “Criminal Minds”, ndërsa filmi i tij i fundit ishte “Top Gun: Maverick” në vitin 2022.