Amnistia penale ende pa zbatim, Gogu: Do diskutohet në Kuvend në ditët në vijim, po presim fillimisht vlerësimin për “Themeloret”

Ministri i Drejtësisë, Toni Gogu, ka bërë me dije arsyet pse amnistia penale, e miratuar nga qeveria në muajin shkurt, ende nuk ka filluar të zbatohet.

Ai shpjegoi se procedura për amnistinë nuk është nisur ende pasi duhet të përfundojnë vlerësimet për kapitullin e “Themeloreve”. Ministri tha se amnistia penale është një instrument i politikës penale të qeverisë, i dizajnuar për të adresuar disa problematika, duke përfshirë mbipopullimin e burgjeve dhe forcimin e mbrojtjes së të drejtave të njeriut.

“Amnistia penale është një instrument i politikës sonë penale, i dizajnuar për të adresuar disa probleme, ku në radhë të parë synohet fuqizimi i mbrojtjes së të drejtave të njeriut dhe lehtësimi i mbipopullimit të burgjeve. Në këtë proces kemi treguar kujdes që të gjithë procesi i avancimit drejt anëtarësimit të shqyrtojë prioritetet sipas rëndësisë.

Amnistia do të procedohet shumë shpejt, pasi të kemi marrë dhe vlerësuar punën që është bërë në lidhje me kapitullin e ‘Themeloreve’. Pas kësaj, do të fillojmë të merremi me amnistinë. Në ditët në vijim besoj se do të fillojë edhe diskutimi në Parlament. Amnistia është një instrument që synon të adresojë mbipopullimin e burgjeve, duke respektuar plotësisht luftën kundër krimit dhe korrupsionit”, tha Gogu.

Amnistia, e miratuar nga qeveria në shkurt dhe që pret të kalojë në Kuvend, do të ndikojë direkt tek qindra persona nëpër burgje. Ministri i Drejtësisë në atë kohë, Besfort Lamallari, theksoi se nga amnistia penale do të përfitojnë 447 persona përfitojnë lirimin e menjëhershëm nga burgu dhe 853 të tjerë përfitojnë ulje dënimi. Mes tyre janë gra, të mitur dhe shtetas të huaj.

Gjithashtu nga kjo amnisti përjashtohen të gjithë personat që janë subjekt hetimesh nga SPAK, si dhe GJKKO.