AMSTERDAM – Rritet presioni mbi Italinë: Holanda rikthen transferimet e migrantëve

AMSTERDAM, 21 gusht /ATSH – ANSA/ – Pas Gjermanisë, Zvicrës, Austrisë, Suedisë dhe Finlandës, edhe Holanda ka njoftuar se do të rifillojë transferimin drejt Romës të migrantëve që kanë mbërritur në Evropë përmes Italisë.

Kjo qasje shkon paralelisht me një tjetër prirje gjithnjë e më të qartë: zhvendosjen jashtë kufijve të Evropës të një pjese në rritje të menaxhimit të migracionit, duke ia besuar qendrave në vendet e treta.

Nga Uganda, e përmendur nga pesë qeveri evropiane, deri te ndryshimi i politikës së qeverisë britanike të Labour-it, modeli i Shqipërisë nuk është më vetëm një eksperiment italian, por në kryeqytetet evropiane po shndërrohet gjithnjë e më shumë në një formulë politike.

Në Hagë, kursi i ri shënohet nga një datë: 12 qershori, dita kur hyri në fuqi Pakti i ri për Migracionin dhe Azilin.

“Po nisim nga zero”, shpjegoi ministri holandez për Azilin, Bart van den Brink, pas një takimi këtë javë me ministrin e Brendshëm italian, Matteo Piantedosi.

Holanda nuk synon të rikthehet te situata e mëparshme: personat që kanë hyrë para 12 qershorit nuk do t’u nënshtrohen transferimeve. Por për ata që kanë mbërritur pas kësaj date, qeveria holandeze paralajmëron se rregullat duhet të zbatohen.

Ky është i njëjti qëndrim i mbajtur tashmë nga vendet e Evropës Veriore. Finlanda po përgatit transferimet, Suedia i ka nisur tashmë dhe synon t’i vazhdojë. Gjermania, Austria dhe Zvicra kanë vepruar në të njëjtin drejtim.

Parimi mbetet ai i përgjegjësisë për shqyrtimin e kërkesës për azil: rregullat e reja parashikojnë, ndër të tjera, që kërkesa për azil të paraqitet në vendin e parë të hyrjes, përveç rasteve kur kritere të tjera përcaktojnë se përgjegjësia i takon një shteti tjetër. / os/