Ankandi ‘Perspectives’ i Leitz-it: printi ikonik i Buzz Aldrin-it në Hënë del në shitje sot në Vjenë

Ankandi fotografik “Perspectives” i Leitz Photographica Auction zhvillohet sot, më 9 tetor, në orën 18:30, në Leica Gallery në Vjenë të Austrisë. Në shitje janë 122 lote që mbulojnë më shumë se një shekull histori fotografie, me punime të mbi 80 fotografëve: nga Robert Frank, Cornell Capa e Helmut Newton te Gordon Parks, Edward Steichen, August Sander, Germaine Krull, Bill Brandt, Horst P. Horst, Irving Penn, Bruce Davidson, Willy Ronis, Ansel Adams, Stephen Shore, Sebastião Salgado, Nan Goldin e Hiroshi Sugimoto, siç njofton Amateur Photographer.

Pika kulmore e ankandit është një print ngjyrash me format të madh i Buzz Aldrin-it në sipërfaqen e Hënës, pranë modulit Eagle — i fotografuar nga Neil Armstrong gjatë misionit Apollo 11 në korrik 1969, një nga fotografitë më ikonike të shekullit XX. Ky print i përkiste personalisht vetë Neil Armstrong-ut dhe shoqërohet me certifikatë origjine nga pasuria familjare.

Po në këtë ankand është edhe një lot me 17 printime vintage argjendi të NASA-s nga vitet 1961–1967, me pamje nga prapaskenat e programit hënor. Ndër veçantitë e tjera spikasin portreti i Sigmund Freud-it i Max Halberstadt-it nga viti 1921, portreti topless i Marilyn Monroe-së “Crucifix II” i Bert Stern-it nga viti 1962 — nga serija e njohur “The Last Sitting” — si dhe 11 imazhe të Martin Luther King Jr. të realizuara nga Benedict J. Fernandez gjatë vitit të fundit të jetës së King-ut. Nuk mungon as një print i nënshkruar “Merced River” (1959) i Ansel Adams-it, ndër lotet më të lakmuara për koleksionistët.

Ekspozita “Perspectives”, ku janë ekspozuar pikat kulmore të ankandit, qëndron e hapur deri më 9 tetor në Leica Gallery Vienna, ndërsa ofertat mund të dorëzohen edhe online përmes leitz-auction.com.