Antonelli ironizon Kim Kardashian pas incidentit në Formula 1

Fituesi i Çmimit të Madh të Monacos, Kimi Antonelli, ka ironizuar Kim Kardashian në rrjetet sociale pasi ylli i televizionit u filmua duke marrë peshqirin e lënë për fituesin e garës.

Në një video të publikuar në Instagram të mërkurën, piloti italian 19-vjeçar shfaqet duke pyetur me humor: “Po pyesja veten, a e keni parë peshqirin tim?”

Më pas kamera kalon te shoku i tij i skuadrës, George Russell, i cili pyetet nëse e ka parë peshqirin e Antonellit, por përgjigjet shkurt: “Jo”.

Në skenën e fundit, Antonelli shihet duke larë duart dhe përsërit sërish pyetjen për vendndodhjen e peshqirit, duke e kthyer situatën në një skeç komik që u pëlqye shumë nga ndjekësit.

Komentuesit në Instagram e quajtën videon “kryevepër”, ndërsa të tjerë përdorën shprehje si “Towel Gate” dhe “Keeping up with Kimi?”, duke iu referuar serialit të famshëm të familjes Kardashian.

Videoja erdhi pasi Kim Kardashian u kap nga kamerat gjatë fundjavës së Formula 1 në Monako duke kaluar pranë podiumit të vendit të parë dhe duke marrë një peshqir të bardhë që ishte lënë për fituesin e garës – pikërisht për Antonellin. Më pas, ajo u pa duke përdorur peshqirin për të fshirë djersën nga fytyra.

Kardashian ndodhej në Monaco për të mbështetur partnerin e saj, Lewis Hamilton, i cili e mbylli garën në vendin e dytë. Gjatë ceremonisë së podiumit, Hamilton i dërgoi një puthje nga larg yllit të reality show-t, ndërsa ajo e filmonte me telefon.

Mediat raportojnë se Kardashian dhe Hamilton kanë nxitur thashethemet për një romancë që prej muajit shkurt, kur u panë duke kaluar një fundjavë romantike së bashku në Mbretërinë e Bashkuar.