Arrestohet 26-vjeçarja në Beograd, dyshohet se i vuri zjarrin katër automjeteve në Mirijevë

Policia e Beogradit ka arrestuar një 26-vjeçare, e dyshuar se i ka vënë zjarrin katër automjeteve në lagjen Mirijevë. Siç njofton Direktno.rs, pjesëtarët e Drejtorisë së Policisë Kriminale në Beograd, në bashkëpunim me Prokurorinë e Parë Themelore, e kanë privuar nga liria Erikën M. (26), nën dyshimin për veprën penale të shkaktimit të rrezikut të përgjithshëm.

Sipas raportimit të Direktno.rs, dyshohet se ajo më 10 tetor, rreth orës 02.55 pas mesnate, ka shkaktuar qëllimisht zjarr në katër automjete të parkuara në rrugën Jovanke Radakoviç në Mirijevë. Nga zjarri është dëmtuar edhe fasada e ndërtesës së banimit aty pranë dhe është shkaktuar dëm i madh material.

Siç raportuan mediat serbe natën e ngjarjes, banorët e ndërtesës u zgjuan nga shpërthimet dhe u evakuuan gjatë ndërhyrjes së zjarrfikësve të njësisë Zvezdara, të cilët e lokalizuan zjarrin për rreth gjysmë ore. Në incident, për fat, nuk pati të lënduar.

Gjatë arrestimit, sipas raportimeve, policia i gjeti të dyshuarës edhe 30 paketa marihuanë. Hetimet për rrethanat dhe motivin e zjarrvënies po vazhdojnë.