Arrestohet një banor i Nishit për kërcënime ndaj gjeneralit në pension Vladimir Lazareviç

Policia e Nishit arrestoi sot M.M. (59) nga ky qytet, me dyshimin se publikoi në rrjetet sociale komente me përmbajtje kërcënuese drejtuar gjeneralit në pension Vladimir Lazareviç. Të dyshuarit i është caktuar paraburgimi deri në 48 orë, pas së cilës me kallëzim penal do të dërgohet në prokurorinë kompetente.

Aksioni u zhvillua me urdhër të Prokurorisë së Lartë Publike në Beograd, Departamentit Special për luftën kundër krimit të teknologjisë së lartë. M.M. i publikoi komentet dje, më 25 shtator, duke kryer veprën penale “rrezikim i sigurisë”.

Përmbajtja e saktë e komenteve nuk dihet. Nuk dihet as nëse ato lidhen me paraqitjen publike të gjeneralit Lazareviç, komandant i Korpusit të Prishtinës të Ushtrisë së Jugosllavisë gjatë luftës në Kosovë më 1999 dhe i dënuar nga Haga, në “tribunën publike” të mbajtur më 24 shtator në Sheshin e Mbretit Aleksandër në Nish.

Me atë rast ai foli për përvojën e luftës, viktimat serbe dhe patriotizmin, dhe i bëri thirrje qytetarëve që më 25 tetor në zgjedhjet parlamentare të votojnë listën e pushtetit “Ujedinjena Srbija”, sepse “kështu mbrohet Serbia”.

Tribuna u mbajt paralelisht me tubimin përpara Teatrit Popullor aty pranë, ku studentët dhe qytetarët pritën çiklistët e aksionit “Ruajtësit e Kushtetutës” që pedaluan nëpër Serbi. Lazareviç pati gjatë shtatorit edhe dy tribuna të tjera të tilla — në Nish dhe në Sërlligj.

Burimi: Danas