Avokati: Protesta u shkatërrua nga të infiltruarit, dialogu me qeverinë do të sillte paqe sociale

Një dialog mes qeverisë dhe protestuesve që prej një muaji mblidhen para Kryeministrisë do të sillte paqe sociale në vend. Kështu u shpreh avokati Edmond Petraj gjatë një interviste në emisionin “Sot Live në Shqipëri” në Report TV, ku kritikoi aktet e dhunës të ditëve të fundit dhe tha se protesta është shkatërruar nga të infiltruarit dhe larguar nga kauza me të cilën nisi.

Sipas Petrajt, protesta duhej të kishte mbetur e fokusuar te çështjet sociale, si kostot e jetesës dhe vështirësitë ekonomike të qytetarëve, ndërsa përplasjet me Policinë vetëm sa e kanë dëmtuar atë.

Duke komentuar ngjarjet e së enjtes, kur protestuesit goditën efektivët e Policisë me gurë dhe sende të forta, ai u shpreh se protesta është shkatërruar nga persona të infiltruar dhe se asaj i mungon zëri i intelektualëve, të cilët, sipas tij, nuk dalin publikisht sepse kanë frikë të flasin nga etiketimet.

“Protesta duhej fokusuar tek çështjet sociale. Protesta nisi shumë bukur dhe e prishën. Intelektualët që janë sot më të goditurit nuk dalin, kanë frikë të flasin sepse shahen si patronazhistë. Protesta në bulevard, edhe 100 veta të jenë, qeveria duhet t’i dëgjojë kërkesat e tyre. Po të kishin ndenjur te problemet sociale, kostot e jetesës, protesta do kishte drejtim fantastik”, u shpreh Petraj.

Sipas tij, zgjidhja do të ishte që drejtimin e protestës ta merrte një grup serioz nismëtarësh jashtë politikës, ose partitë e vogla të dilnin hapur për ta udhëhequr dhe për të krijuar një pol të tretë politik.