Bardhi akuzon ministrin Hoxha për gjuhë fyese ndaj shqiptarëve të Maqedonisë së Veriut, Ministria e Jashtme e mohon: Tymnajë e qëllimshme

Kreu i Grupit Parlamentar të Partisë Demokratike, Gazment Bardhi, ka akuzuar ministrin e Punëve të Jashtme, Ferit Hoxha, se ka përdorur gjuhë fyese ndaj shqiptarëve të Maqedonisë së Veriut, duke e cilësuar deklaratën e tij “skandaloze” dhe “të papranueshme”. Bardhi kërkoi dorëheqjen e menjëhershme të ministrit, duke theksuar se një qëndrim i tillë “cenon dinjitetin e shqiptarëve” dhe “e bën të pamundur vijimin e ushtrimit të detyrës”.

“Është e papranueshme dhe e patolerueshme që një zyrtar i lartë publik t’u referohet shqiptarëve si “idiotë”. Një qëndrim i tillë e përjashton menjëherë nga çdo funksion publik dhe e bën të pamundur vijimin e ushtrimit të detyrës, qoftë edhe për një minutë më shumë. Aq më tepër kur bëhet fjalë për ministrin përgjegjës për përfaqësimin e Shqipërisë në arenën ndërkombëtare.

Kjo gjuhë e papërgjegjshme dhe denigruese jo vetëm që cenon rëndë dinjitetin e shqiptarëve, por krijon bindjen se kemi të bëjmë me një përfaqësues që flet në frymën e propagandës së huaj dhe jo në interes të Republikës së Shqipërisë. Kjo deklaratë është e denjë vetëm për Nikola Pashiqin apo Vasa Çubrilloviç. Një retorikë e tillë bie haptazi ndesh me nenin 8 të Kushtetutës së Republikës së Shqipërisë. Ferit Hoxha duhet të japë menjëherë dorëheqjen. Çdo vonesë është e pajustifikueshme.Kryeministri ka detyrimin politik dhe institucional ta shkarkojë pa asnjë hezitim dhe të distancohet publikisht dhe qartë nga kjo gjuhë fyese dhe e papranueshme, që të kujton retorika të errëta të së kaluarës kundër shqiptarëve”, shkruan Bardhi.

Ndërkohë, Ministria për Evropën dhe Punët e Jashtme ka mohuar kategorikisht akuzat. Sipas zëdhënësit e Ministrisë, publikimet e shpërndara sot në mediat sociale janë të pavërteta dhe nuk kanë asnjë lidhje me realitetin. Ai shtoi se pretendimet e tilla janë të fabrikuara dhe se Shërbimi i Jashtëm vijon të përmbushë detyrat me profesionalizëm, pa u ndikuar nga “zhurmat dhe tymnajat e qëllimshme”.

“Zëdhenësi i Ministrisë për Evropën dhe Punët e Jashtme shpreh keqardhjen për publikimet e shpërndara sot në mediat sociale, të cilat pretendojnë të paraqesin komunikime të brendshme, por që në fakt janë të pavërteta. Ato nuk kanë asnjë lidhje me realitetin. Komunikimi i servirur publikut është i paqenë. Është për të ardhur keq që pretendime të tilla fabrikohen dhe më pas amplifikohen nga aktorë politikë në vend.

Kjo nuk është hera e parë që në arenën publike hidhen pretendime se anëtarë të shërbimit të jashtëm gjoja shkelin betimin e tyre. Ministri Hoxha shpreh besim të plotë në ndershmërinë dhe profesionalizmin e Shërbimit të Jashtëm, i cili vijon të përmbushë detyrat me përkushtim, duke u fokusuar në punën e tij dhe duke mos u ndikuar nga zhurmat dhe tymnajat e qëllimshme”, theksohet në reagim.