Bardhi në Kushtetuese: Prokuroria nuk na ndalon hetimin parlamentar

Në Gjykatën Kushtetuese është duke u shqyrtuar ankimi i deputetëve të Partisë Demokratike lidhur me ngritjen e komisioneve hetimore për çështjen “McGonigal” dhe zgjedhjet parlamentare të 11 majit.

Gjatë seancës, kreu i grupit parlamentar të PD-së, Gazment Bardhi, ngriti shqetësimin se opozita po has pengesa në ushtrimin e funksioneve të saj parlamentare, duke theksuar se nuk po pranohen kërkesat për interpelanca me kryeministrin apo për marrjen e informacionit.

“Ne nuk na pranohet asnjë kërkesë për interpelancë, asnjë kërkesë për marrje informacioni. Ky gjykim sot në Gjykatën Kushtetuese ka të bëjë me faktin nëse jemi në republikë parlamentare që funksionon sipas Kushtetutës apo një republikë me vullnet të një partie”, deklaroi Bardhi.

Ai shtoi se gjatë gjithë procesit janë dhënë arsye të ndryshme për refuzimin e kërkesave të opozitës, ndërsa theksoi se komisionet parlamentare janë organe ndihmëse të Kuvendit, ndërsa komisionet hetimore kanë funksion kontrollin ndaj ekzekutivit.

Bardhi tha se, ndonëse Prokuroria e Posaçme ka nisur hetime, kjo sipas tij nuk mund të përdoret si argument për të kufizuar të drejtën e Kuvendit për hetim parlamentar.

“Prokuroria nuk na detyron të mos ushtrojmë kompetencën tonë kushtetuese”, deklaroi ai.

Sipas tij, përgjegjësia administrative apo penale i takon institucioneve të drejtësisë dhe jo mekanizmave parlamentarë.

“Përgjegjësia ligjore administrative apo penale është kompetencë e institucioneve përkatëse që kryhen nga ligji”, u shpreh Bardhi.