Basha: Po vazhdojnë kontrollet ndaj automjeteve të mbingarkuara

Ministria e Infrastrukturës dhe Transportit, në bashkëpunim me Policinë e Kosovës, po vazhdon kontrollet ndaj automjeteve që tejkalojnë kufijtë e lejuar të peshës.

Kështu ka bërë të ditur ministri në detyrë i Infrastrukturës dhe Transportit, Dimal Basha, i cili tha se mbingarkesa e automjeteve paraqet rrezik për sigurinë në komunikacion dhe dëmton infrastrukturën rrugore.

“Respektimi i kufijve të lejuar të peshës është thelbësor për sigurinë në komunikacion dhe për mbrojtjen e infrastrukturës rrugore”, ka shkruar Basha në Facebook.

Sipas tij, automjetet e mbingarkuara rrisin rrezikun për aksidente, ndërsa dëmtimi i rrugëve përkeqësohet sidomos gjatë periudhave me temperatura të larta.

“Mbingarkesa e automjeteve rrit rrezikun e aksidenteve, dëmton rrugët dhe, sidomos gjatë temperaturave të larta, përshpejton dëmtimin e asfaltit”, ka deklaruar ai.

Basha ka falënderuar Policinë e Kosovës për bashkëpunimin në realizimin e kontrolleve, ndërsa ka paralajmëruar vazhdimin e monitorimit në terren.

“Do të vazhdojmë monitorimin në terren me të gjitha kapacitetet që kemi, për të mbrojtur infrastrukturën dhe për të garantuar siguri më të madhe për të gjithë pjesëmarrësit në komunikacion”, ka shkruar ministri në detyrë. /Telegrafi/