Basha takon vëzhguesit OSBE-ODHIR: Votimi dhe numërimi elektronik, kushti parësor i PD

Votimi dhe numërimi elektronik është kërkesa dhe kushti parësor i opozitës shqiptare, pasi kështu do të eleminoheshin shumë prej problemeve zgjedhore.

Kështu u shpreh kreu i PD, Lulzim Basha në një takim me kreun e delegacionit të vëzhguesve të OSBE-ODHIR Peter Tejler për zgjedhjet parlamentare të Qershorit 2017.

Basha u shpreh se vonesat dhe mungesa e vullnetin nga ana e qeverisë mund të cënojë procesin për një hartuar një reformë tërësore.

Kreu i opozitës kërkoi mbështetjen dhe eskpertizën e misionit të OSBE/ODIHR-it për implementimin e rekomandimeve.

Reforma Zgjedhore duhet të përballet me shumë prej problematikave të shumta të procesit si lista e zgjedhësve, sistemin e adresave, përdorimin e financimeve dhe individëve me rekorde kriminale, përdorimin e pushtetetit, votën e emigrantëve dhe mbi të gjitha shit-blerjen e votës.

Basha tha se PD kërkon me ngulm një reformë tërësore që jo vetëm të adresojë e të zgjidhë problemet e mëdha të procesit, por edhe të fuqizojë të drejtën e qytetarëve për të vendosur si dhe të kufizojë pushtetin e kryetarëve të partive.

Po ashtu, ngritja e një institucioni të pavarur nga qeveria për të ndalur presionet dhe abuzimet mbi administratën është e domosdoshme, ashtu si ndjekja dhe penalizimi fort i çdo rasti të evidentuar për shit-blerje vote.

Basha mori mbështetjen e Ambasadorit Tejler për një bashkëpunim të plotë me OSBE/ODIHR-in, me eskpertët e tyre më të mirë për të asistuar në hartimin e reformës zgjedhore.