Bayern përgatit shitjen e parë për verën, 25 mln euro për një lojtar rezervë

Pas sigurimit të titullit në Bundesligë, Bayern është fokusuar totalisht te Champions League, tani te gjysmëfinalja e kthimit ndaj PSG-së, pas humbjes 5-4 në Paris. Megjithatë, bavarezët kanë filluar të projektojnë lëvizjet e para që do të bëjnë në verë, ku për të bërë disa afrime të reja, është e nevojshme të bëhen më parë disa largime.

Sports Boom zbulon se Bayern ka vendosur të ndajë rrugët me mbrojtësin Hiroki Ito, i cili edhe pse është nën kontratë deri në vitin 2028, nuk është në planet e bavarezëve për sezonin e ri. Bayern pret të përfitojë të paktën 25 milionë euro nga shitja e mbrojtësit japonez këtë verë.

Destinacioni i ri i Hiroki Ito duket se do të jetë Premier League, pasi ka interes konkret nga Leeds dhe Brighton. Ito mund të luajë si mbrojtës i majtë, qendërmbrojtës dhe mesfushor difensiv, gjë që e bën atë një lojtar të vlefshëm për të mbuluar disa pozicione.