Beçiç me drejtorin e IRI-së Nix: Mali i Zi e ka bërë pjesën më të madhe të punës, objektivi është anëtarësimi në BE në 2028

“Mali i Zi e ka bërë pjesën më të madhe të punës që i takonte. Dinamika e reformave është intensifikuar, sepse objektivi ynë është i qartë – viti 2028 dhe Mali i Zi si pjesë e familjes evropiane”, deklaroi zëvendëskryeministri për siguri, mbrojtje, luftë kundër krimit dhe politikë të brendshme, Aleksa Beçiç, në takimin me drejtorin rajonal të Institutit Republikan Ndërkombëtar (IRI) për Evropën dhe Euroazinë, Stephen Nix, siç njofton ETV.

Sipas njoftimit të kabinetit të tij, të cilin e përcjell ETV, Beçiç bisedoi me Nix dhe përfaqësues të tjerë të shquar të IRI-së për proceset aktuale politike, perspektivën evropiane të Malit të Zi, forcimin e institucioneve dhe thellimin e mëtejshëm të bashkëpunimit. Ai theksoi se Mali i Zi është i vendosur pa mëdyshje për tri prioritetet kyçe të politikës së jashtme: anëtarësimin e plotë në Bashkimin Evropian, aleancën e besueshme në NATO dhe forcimin e stabilitetit rajonal e marrëdhënieve të fqinjësisë së mirë.

Duke folur për integrimet evropiane, sipas raportimit të ETV-së, Beçiç vlerësoi se mbyllja e përkohshme e dy kapitujve të tjerë negociues, 1 dhe 12, është konfirmim shtesë i përparimit të Malit të Zi, kujtoi sukseset e mëdha në kapitujt 23 dhe 24 dhe nënvizoi rëndësinë e përparimit të mëtejshëm në fushën e sundimit të ligjit.

Për zhvillimet e brendshme politike, Beçiç theksoi rëndësinë e një mazhorance të qëndrueshme parlamentare dhe të mbështetjes për reformat: “Kur ka vullnet politik dhe vetëdije për momentin historik, dallimet mund të tejkalohen në interes të qytetarëve dhe të ardhmes evropiane të Malit të Zi. Integrimet evropiane duhet të jenë mbi çdo parti dhe çdo interes të veçantë.”

Ai nënvizoi edhe rolin gjithnjë e më të rëndësishëm të të rinjve dhe grave në politikat publike, rritjen e pagave dhe domosdoshmërinë e vazhdimit të luftës së vendosur kundër krimit të organizuar dhe korrupsionit: “Nuk ka ekonomi të fortë, rend të sigurt shoqëror e as të ardhme evropiane pa luftë të vendosur kundër krimit dhe korrupsionit. Parimi ynë është i thjeshtë – nuk ka të mbrojtur e të paprekshëm dhe askush nuk mund të jetë më i fortë se shteti dhe institucionet e tij.”

Siç njofton ETV, Beçiç vlerësoi veçanërisht mbështetjen e vazhdueshme të Shteteve të Bashkuara për Malin e Zi, ndërsa Nix dhe përfaqësuesit e IRI-së shprehën kënaqësinë për bashkëpunimin e deritanishëm, vlerësuan përpjekjet reformuese dhe përparimin e Malit të Zi dhe shprehën gatishmërinë për mbështetje të mëtejshme. Bashkëbiseduesit u pajtuan se stabiliteti, institucionet e forta dhe zbatimi i qëndrueshëm i reformave janë kyçe për arritjen e objektivit evropian të Malit të Zi.