BELGJIKË – Protestat e nxënësve përshkallëzohen në disa qytete

BRUKSEL, 5 tetor /ATSH-AFP/ – Protestat e nxënësve të shkollave të mesme në Belgjikë u përshkallëzuan sot në disa qytete, duke shkaktuar përleshje me policinë, dëmtime të pronës dhe dhjetëra arrestime.

”Në Liezh, 18 policë pësuan dëmtime të lehta”, sipas policisë lokale.

Kjo ishte dita e tretë e protestave, të zhvilluara nga nxënësit e arsimit të mesëm në pjesën frankofone të Belgjikës kundër masave të kursimit të paralajmëruara nga autoritetet.

Lëvizja u përhap sot edhe në qytete të tjera të mëdha, përfshirë Mons dhe Charleroi, në jug të vendit.

Në këto qytete pati arrestime për shkelje të rendit publik.

Në Liezh, policia vlerësoi se rreth 1 000 protestues ishin mbledhur në grupe të vogla dhe shumë të lëvizshme.

Ata kalonin nga një institucion arsimor në tjetrin, duke zhvilluar protesta që policia i përshkroi si të çorganizuara.

Situata u përshkallëzua gjatë pasdites, kur disa protestues sulmuan stacionet e autobusëve dhe ndezën zjarre në rrugë, kryesisht duke u vënë flakën koshave të mbeturinave.

Protestuesit hodhën objekte, gurë dhe barriera në drejtim të policisë.

Forcat e rendit u kundërpërgjigjën me gaz lotsjellës dhe topa uji, sipas policisë së Liezhit.

Në një shesh në qendër të qytetit, ku u regjistruan dëmet kryesore, disa dyqane dhe marka të mëdha tregtare vendosën të mbyllnin përkohësisht aktivitetin për arsye sigurie.

Ndërkohë, gjatë një proteste në Hannut, një qytet i vogël në perëndim të Liezhit, një mjet piroteknik përfundoi në oborrin e një shkolle fillore.

Rreth 15 fëmijë u prekën nga shkëndijat dhe u desh të merrnin ndihmë nga ekipet e ambulancës, sipas agjencisë belge të lajmeve Belga.

Protestat pasqyrojnë pakënaqësinë në rritje të të rinjve ndaj politikave të kursimit dhe masave ekonomike në Belgjikën frankofone, por përshkallëzimi i dhunës dhe dëmtimeve ka krijuar shqetësime të reja për sigurinë publike./ /Ad.Ab./ a.jor.