Berisha: Kuvendi shënon ripërtëritjen e PD-së, ata që do kenë dyshime për votat, të kërkojë rinumërimin

Kuvendi Kombëtar i Partisë Demokratike u mbyll këtë të shtunë nën moton “Ripërtëritje”, duke miratuar ndryshime statutore dhe duke zgjedhur strukturat e reja drejtuese.

Pas mbylljes, Sali Berisha deklaroi se Kuvendi Kombëtar i Partisë Demokratike përbën një moment të rëndësishëm për ripërtëritjen e forcës politike. Sipas tij, qëllimi kryesor mbetet forcimi i partisë si kusht për rikthimin e votës së lirë dhe ardhjen e opozitës në pushtet. Ai u shpreh i inkurajuar mbi atmosferën si dhe diskutimet që u zhvilluan.

“Me diskutimin e Jonathan Panos u mbyll seria e diskutimeve të shkëlqyera në këtë Kuvend, i cili me debatin, me dokumentet, përcakton si qëllim ripërtëritjen e Partisë Demokratike në kilometrin e saj të fundit, si kusht themelor që të realizojë objektivin e vet, rikthimin e votës së lirë tek shqiptarët dhe fitoren e opozitës.

Potencialet janë të mëdha, vullneti është i hekurt, ndaj dhe unë zotohem para demokratëve, demokrateve dhe mbarë opozitarëve se me përkushtim të madh do bëjmë gjithçka të kthejmë në vepra, të konkretizojmë përcaktimet dhe premtimet e këtij Kuvendi në mënyrë që Partia Demokratike të ecë e vendosur dhe të përmbushë misionin e saj.

Unë ndoqa me shumë interes diskutimet, jam i inkurajuar prej tyre, mendimet që u shprehën. Pra, në qoftë se do të lexoni të palexueshmen, atë që kishte atmosfera e sallës, ajo ishte ripërtëritja dhe ndryshimi në drejtimet e përcaktuara i Partisë Demokratike”, tha Berisha.

Sa i përket procesit të votimit, Berisha theksoi se kushdo që ka dyshime për numërimin e votave, do të ketë të drejtën të kërkojë rinumërimin e tyre.

“Ju falënderoj dhe ju për ndjekjen që i bëtë punimeve të këtij Kuvendi. Do ta quaja unë në shumë aspekte një Kuvend jashtëzakonisht të rëndësishëm dhe e vërteta është që me një zhvillim normal, për të mos thënë të përsosur. Tani le të presim rezultatin e votimeve, të cilat në mos gaboj do fillojnë nga ora 8 e darkës.

Këtu dua të garantoj, sigurisht, se kur janë për një vend mbi dy kandidatura, njëri fiton, tjetri nuk fiton, por një gjë theksoj: se në vlerësimin tim ato kanë qenë kandidaturat më dinjitoze që janë paraqitur ndonjëherë.

Së dyti, pavarësisht nëse marrin apo jo votat, çdonjëri prej tyre mbetet një aset i çmuar i Partisë Demokratike.

Së treti, çdo njeri që do ketë dyshimin më të vogël do të ketë të drejtë të numërojë votat e veta. Kjo është maksimumi i transparencës që mund të bëjmë.