Berisha, thirrje Ramës: Jep dorëheqjen para orës 19:00

Pavarësisht se në 34 ditë proteste, krahas thirrjeve për dorëheqjen e Edi Ramës, protestuesit kërkojnë edhe largimin e Sali Berishës nga politika, kryedemokrati thotë se demokratët do ta mbështesin këtë lëvizje qytetare, pasi thirrjet kundër tij janë të sponsorizuara.

Në protestën e kësaj të shtune janë bërë thirrje të bashkohen edhe shqiptarët e diasporës. Berisha, me ndjenjën e përkatësisë së kësaj proteste, paralajmëron Ramën të mos guxojë të dhunojë qytetarët, siç thotë ai se ndodhi të enjten përpara parlamentit.

Kryedemokrati kujtoi se kërkesën e protestuesve për qeveri teknike e ka kërkuar e para opozita e tij, sikurse edhe kërkesat e tjera për shfuqizimin e ligjeve, të cilat i kanë depozituar si amendamente në Kuvend, bashkë me mocionin e mosbesimit ndaj qeverisë, por nuk pranohen nga socialistët. Për këtë arsye, demokratët do të qëndrojnë jashtë parlamentit derisa kërkesat e tyre të merren në konsideratë.

 “Nuk pranon mocionet të cilat janë të përcaktuara në kushtetutë. Ne kemi depozituar, por edhe një sqarim do bëj këtu: ka tre javë që kemi depozituar në Kuvendin e Shqipërisë kërkesën për ndryshimin e ligjeve të kërkuara nga përfaqësia e protestës. Kryetari i parlamentit, dhe në veçanti Taulant Balla, nuk pranon t’i fusë në rendin e ditës. Për këtë arsye, grupi parlamentar vendosi të mos paraqitet në seancë plenare derisa të paraqiten amendamentet për ndryshimin e ligjeve që kërkojnë përfaqësuesit e protestës”.

4 korriku është festa e Pavarësisë së SHBA-së, për të cilën Berisha bëri urimin e tij, por është edhe dita e lindjes së Edi Ramës, për të cilin në vend të mesazhit të urimit dha një këshillë: “Jep dorëheqjen para orës 19:00…”