“Bindja Demokratike”, regjistrohet në KQZ për zgjedhjet e 30 qershorit

”Bindja Demokratike” do të marrë pjesë në zgjedhjet lokale të 30 qershorit, pas zyrtarizimit në KQZ të regjistrimit të saj. Me 4 vota pro dhe 1 kundër, KQZ vendosi se Bindja Demokratike, e regjistruar me kryetar Astrit Patozin, i ka plotësuar kushtet ligjore për të marrë pjesë në zgjedhjet lokale.

Vota e vetme kundër ishte e kryetarit të KQZ-së, Klement Zguri, me argumentin se ky subjekt nuk i plotëson kriteret ligjore.

KQZ po ashtu vendosi regjistrimin në zgjedhje të 7 partive të tjera për zgjedhjet lokale të 30 qershorit. Kështu, u regjistruan në zgjedhje subjektet “Partia Aleanca e Maqedonasve për Integrimin Europian”, “Partia Balli Kombëtar”, “Partia G-99”, “Partia Aleanca Demokrate Shqiptare”, “Partia Aleanca Arbnore Kombëtare”, “Partia Shqipëria e Re”, “Partia Aleanca Popullore”.

KQZ vendosi edhe regjistrimin e komitetit nismëtar për organizimin e punës për paraqitjen e Fran Mollës si kandidat i propozuar nga zgjedhësit në zonën zgjedhore Tiranë për zgjedhjet për organet e qeverisjes vendore të datës 30 qershor 2019.