BM – Burnham kërkon marrëdhënie më të afërta me BE-në: Brexit-i ka sjellë më shumë dëme sesa të mira

– Kryeministri britanik, Andy Burnham deklaroi sot se Britania e Madhe, duhet të shqyrtojë mundësinë e marrëdhënieve më të afërta me Bashkimin Evropian, sipas “Reuters”.

Ai tha se më vonë, gjatë këtij viti do të paraqesë mundësi të ndryshme për mënyrën se si Britania e Madhe mund të bashkëpunojë me BE-në në të ardhmen.

Burnham deklaroi gjithashtu se Brexit-i ka sjellë më shumë dëme sesa të mira.

Brexit quhet procesi përmes të cilit Britania e Madhe u largua nga Bashkimi Evropian.

Çfarë po propozon Burnham?

Burnham tha se Britania e Madhe duhet të vendosë se çfarë marrëdhënieje afatgjatë dëshiron të ketë me BE-në, e cila vazhdon të jetë tregu më i madh i BM-së.

Ai nuk njoftoi se Britania e Madhe do të rikthehet në BE.

Në vend të kësaj, Burnham tha se do të paraqesë disa alternativa dhe do të kërkojë një marrëveshje të gjerë mbi mënyrën se si duhet të zhvillohen marrëdhëniet me vendet evropiane.

Kjo mund të nënkuptojë ndryshime në disa nga kufizimet, që Partia Laburiste kishte vendosur më parë për marrëdhëniet me BE-në, përfshirë qëndrimin për tregun e përbashkët evropian dhe bashkimin doganor.

Tregu i përbashkët është sistemi që lejon qarkullimin më të lirë të mallrave, shërbimeve, kapitalit dhe njerëzve mes vendeve pjesëmarrëse.

Bashkimi doganor do të thotë që vendet zbatojnë rregulla të përbashkëta për tarifat doganore ndaj mallrave që vijnë nga vende jashtë këtij bashkimi.

Çfarë tha për ekonominë dhe emigracionin?

Burnham tha se Brexit-i nuk i ka dhënë Britanisë së Madhe kontrollin që ishte premtuar.

Sipas tij, Britania e Madhe ka humbur një pjesë të kontrollit mbi ekonominë, ndërsa ekonomia ka pasur rritje të dobët për një periudhë të gjatë.

Ai tha gjithashtu se Britania e Madhe ka humbur një pjesë të kontrollit mbi emigracionin, pasi pas largimit nga BE-ja u dobësua bashkëpunimi me vendet evropiane.

Burnham tha se qeveria tani po punon për ta rikthyer këtë kontroll dhe vlerësoi punën e ministres së Brendshme, Shabana Mahmood, për ndryshimet në sistemin e emigracionit.

Çfarë do të ndodhë më tej?

Një takim i nivelit të lartë BM-BE, i planifikuar fillimisht në korrik, u shty pas largimit nga detyra të paraardhësit të Burnham, Keir Starmer. Ende nuk është përcaktuar një datë e re.

Burnham tha se rreth këtij takimi do t’i paraqesë publikut, alternativat për marrëdhënien e ardhshme të Britanisë së Madhe me BE-në. /