BM – Burnham premton plan 10-vjeçar për ndryshim

– Kryeministri i ri i Britanisë së Madhe, Andy Burnham, deklaroi në fjalimin e tij të parë përpara Downing Street se vendi ka nevojë për një “ndryshim rrënjësor” dhe premtoi se më vonë gjatë këtij viti do të paraqesë një plan 10-vjeçar për të transformuar Britaninë, sipas BBC.

Ai e cilësoi momentin si një “pikë kthese” për vendin, duke thënë se qeveria e tij synon të rikthejë besimin e publikut në politikë dhe të përmirësojë standardin e jetesës.

Burnham njoftoi se masat e para për përballimin e kostos së lartë të jetesës do të shpallen duke nisur nga dita e nesërme.

Në fjalimin e tij, Burnham u zotua të luftojë fenomenin e njerëzve që flenë në rrugë, duke synuar eliminimin e tij përmes investimeve në strehim social dhe ndërtimit të më shumë banesave publike.

Ai premtoi gjithashtu se do të respektojë angazhimet e Britanisë për mbrojtjen dhe sigurinë kombëtare, duke theksuar se forcimi i mbrojtjes do të ecë paralelisht me investimet në shërbimet publike dhe mirëqenien sociale.

Burnham u bë kryeministri i pestë britanik në vetëm katër vjet, pasi u ftua nga mbreti në Pallatin Buckingham për të formuar qeverinë e re.

Më vonë gjatë ditës ai pritet të nisë procesin e emërimit dhe shkarkimit të ministrave, ndërsa ministri i burgjeve, Lord Timpson, dha dorëheqjen që në mëngjes, duke sinjalizuar fillimin e riorganizimit të kabinetit.

Ndërkohë, identiteti i anëtarëve të kabinetit të ri mbetet ende i panjohur. Sipas analistëve politikë, ekipi i Burnham ka ruajtur një nivel të lartë sekretese rreth përbërjes së qeverisë së re.

Pak më herët, ish-kryeministri Keir Starmer paraqiti zyrtarisht dorëheqjen e tij, duke u larguar nga Downing Street me fjalët se po largohej “me dinjitet dhe me një buzëqeshje”, duke i uruar sukses pasardhësit të tij. /Ad.Ab./ a.jor.