Bordi i Transparencës rrit sërish çmimin e naftës dhe benzinës

Bordi i Transparencës ka vendosur në mbledhjen e tij të datës 16 maj 2026 çmimet e reja tavan për nënproduktet e naftës, duke përcaktuar kufijtë maksimalë të shitjes me pakicë dhe shumicë në të gjithë vendin.

Sipas vendimit, nafta do të tregtohet me 4 lekë më shumë se çmimi i vendosur në mbledhje ne fundit të Bordit ndërkohë, çmimi i benzinës me 3 lekë më shumë për litër.

“Çmimi i shitjes me pakicë i nënproduktit gazoil i standardit SSH EN 590 të jetë jo më shumë se 202 lekë/litri, ndërsa i shitjes me shumicë jo më shumë se 190 lekë/litër. Çmimi i shitjes me pakicë i nënproduktit benzinë e standardit SSH EN të jetë jo më shumë se 188 lekë/litri, ndërsa i shitjes me shumicë jo më shumë se 176 lekë/litër”, thuhet në njoftim.

Vendimi hyn në fuqi menjëherë, më 16 maj në orën 13:00, dhe do të mbetet në fuqi deri në mbledhjen e radhës së Bordit, ku pritet të rishikohen sërish çmimet në varësi të lëvizjeve në tregjet ndërkombëtare.

Bordi u bën thirrje të gjithë operatorëve të tregut të naftës që të zbatojnë me përpikëri vendimin, duke paralajmëruar se në rast shkeljesh mund të merren masa deri në pezullimin e aktivitetit të subjekteve përkatëse.

Në njoftim theksohet se Ministria e Ekonomisë dhe Inovacionit, Ministria e Financave dhe Ministria e Infrastrukturës dhe Energjisë mbeten të angazhuara për mbrojtjen e konsumatorëve dhe garantimin e konkurrencës së ndershme në tregun e karburanteve.

Në sqarimin shoqërues, Bordi referon Aktin Normativ nr. 1, datë 3.4.2026, i cili parashikon rregullime të akcizës në varësi të nivelit të çmimeve të tregut. Sipas këtij akti, nëse çmimi i gazoilit kalon 220 lekë për litër ose benzina 200 lekë për litër, aplikohet një nivel i reduktuar i akcizës prej 80%. Megjithatë, aktualisht çmimet mbeten nën këtë prag, ndaj akciza zbatohet në nivelin e plotë, 100%.