BOTËRORI 2026 – “Losers Cafe” streha e tifozëve të zhgënjyer

– Në një kohë kur rrugët e Meksiko Siti-t u mbushën me festime pas fitores së Meksikës ndaj Ekuadorit në Kupën e Botës, një kafene në lagjen Condesa zgjodhi të bëjë krejt të kundërtën; të mirëpresë tifozët e skuadrave të eliminuara dhe t’u ofrojë ngushëllim, sipas Reuters.

E quajtur “Losers Cafe”, kafeneja është shndërruar në një strehë simbolike për mbështetësit e ekipeve humbëse.

Çdo mëngjes në hyrje ngrihen flamujt e kombëtareve të eliminuara, ndërsa çdo tifoz që paraqitet me fanellën e skuadrës së tij humbëse merr falas një pije.

Edhe pecetat mbajnë mesazhin humoristik “fshiji lotët”.

Një nga vizitoret ishte 24-vjeçarja Monse Aguilar, fotografe dhe tifoze e Afrikës së Jugut, e cila shkoi në kafene pasi skuadra e saj u eliminua nga Kanadaja. Ajo e përshkroi përvojën si “një përqafim për zemrën pas humbjes”.

Ideja lindi nga marka suedeze e pijeve bimore “Oatly,” e cila bashkëpunoi me pronarin e kafenesë, Ian Infante. Lokali i tij, i njohur zakonisht si “Compay Cafe”, nisi si një stendë e vogël rruge dhe më pas u kthye në një kafene të njohur.

Infante, me origjinë nga Venezuela, tha se si emigrant e kuptoi menjëherë ndjenjën e boshllëkut që lë pas humbja, ndaj koncepti i kafenesë iu duk krejtësisht natyral.

Fillimisht, shumë klientë nuk e kuptonin idenë dhe refuzonin të quheshin “humbës”. Megjithatë, pasi u shpjegohej se kafeneja synonte të krijonte solidaritet dhe humor mes tifozëve të zhgënjyer, atmosfera bëhej shumë më pozitive.

Sipas përfaqësueses së “Oatly” në Meksikë, kompania zgjodhi ta realizonte këtë nismë në kryeqytetin meksikan për shkak të humorit karakteristik të vendasve dhe rritjes së shpejtë të markës në Amerikën Latine.

Ajo tha me shaka se “krijimi i një kafeneje për humbësit në Meksikë kishte kuptim, sepse ne pothuajse gjithmonë humbasim”.

Tani që Meksika ka fituar ndeshjen e saj të parë në fazën me eliminim direkt pas 40 vitesh dhe përgatitet të përballet me Anglinë, tifozët shpresojnë që historia të ndryshojë. Por nëse ëndrra përfundon, ata e dinë se në Condesa i pret gjithmonë “Losers Cafe”, ku humbja ndahet me buzëqeshje dhe një filxhan kafe falas. /Ad.Ab./  a.jor.