Braçe në Kuvend: Modeli i tregut mban çmimet e naftës të larta

Deputeti i PS-së, Erion Braçe, ka ngritur në Kuvend shqetësimin për çmimet e hidrokarbureve, duke theksuar se ato mbeten të larta dhe të ndikuara si nga kriza ndërkombëtare, ashtu edhe nga modeli i tregut në Shqipëri.

Gjatë fjalës së tij, Braçe u shpreh kritik ndaj mënyrës se si funksionon tregu i karburanteve në vend, duke theksuar se struktura aktuale mban çmime të larta për konsumatorët.

“Modeli i tregut mban çmimet e larta dhe për shkak të këtij modeli kemi këtë situatë. Çmimi neto pa taksa vazhdon të mbetet më i larti. Askush nuk ka kurajën të flasë për modelin e tregut apo për modelin e taksës që ne kemi”, deklaroi ai.

Braçe solli në vëmendje edhe ndryshimet në sistemin e taksimit të hidrokarbureve, duke theksuar se disa tarifa janë zhvendosur brenda çmimit final të karburantit.

Ai kishte dhe një përplasje verbale me kreun e PD-së Sali Berisha, pas ndërhyrjeve nga salla.

“Kush po abuzon? (drejtuar Berishës) Hajde këtu dhe fol ti. Më thua mua që po mbroj interesat e tregtarëve. Hajde, thuaje me zë të lartë. Ti s’i ke zënë asnjëherë këtu në sallë. E keni sjellë ju këtë model. Po e kishit 7 lekë, është zgjedhja jonë që e kemi çuar në 27 lekë. Ai çmim 7 lekë nuk është i njëjtë për atë që konsumon pak karburant me atë që konsumon shumë. Me këto tarifa të ulëta që keni vendosur ju, keni favorizuar gjithmonë konsumatorët e mëdhenj”, tha Braçe.