Braçe: Një mori politikanësh dhe ish-ministra dëshmojnë pasuri të pamatë me burim korrupsioni

Nënkryetari i grupit parlamentar socialist, Erjon Braçe shprehet se vendi ka nevojë për një dekriminalizim të plotë për çdo vepër penale, me qëllim rikthimin te ndëshkueshmëria për akuzat e ngritura ligjërisht e të pagjykuara si dhe të pasurisë së paligjshme.

“Dekriminializim me “prioritet vetëm këtë vepër penale” nuk mund të ketë. Dekriminalizimi duhet të jetë i plotë dhe duhet të përfshijë çdo vepër penale! Ndryshe, më duhet të dyshoj se Partia e Berishës po kërkon të amnistojë disa vepra penale që mund të jenë asociuar me politikanë të saj udhëheqës! ( të paktën dy të njohur botërisht)”, shkruan Braçe, ndërsa shton se shkulja e pandëshkueshmërisë duhet të nisë nga ato çështje për të cilat ka akuzë të ngritur, por që nuk janë gjykuar.

Së treti, deputeti socialist shprehet se dekriminalizimi nuk mund të shërbejë për të lënë në harresë një çështje tjetër të rëndësishme, sikurse pasuria e pajustifikuar dhe e padeklaruar.

“Një mori funksionarësh politikë sot, ish-ministra, por edhe politikanë të zakonshëm në kohë të ndryshme, ardhur aty nga përvoja ekzekutive të niveleve të ndryshme, tregohen, por dhe dëshmojnë pasuri të pamatë të pajustifikuar apo me burim korrupsioni. Shkëlqejnë me shtëpitë e tyre të reja në atë që rëndom nëpër Tiranë e quajnë si “Fshati i Samirit”. Ta nisim verifikimin prej aty, të gjejmë pronarët reale të atyre shtëpive”, thekson Braçe.