Britania nacionalizon British Steel për të ruajtur kapacitetin kombëtar të prodhimit të çelikut

Qeveria britanike ka marrë nën pronësi British Steel për të mbrojtur kapacitetin kombëtar të prodhimit të çelikut, pas njoftimeve se pronarët kinezë po shqyrtonin mbylljen e furrave të shkrirjes në fabrikën e Scunthorpe.

Departamenti për Biznes dhe Tregti njoftoi të enjten se vendimi synon të ruajë mijëra vende pune dhe interesin kombëtar duke siguruar furnizimin me çelik të prodhuar në vend për projektet e mëdha ndërtimore dhe industrinë e mbrojtjes, raporton Associated Press.

Sekretari i Biznesit, Peter Kyle, tha se British Steel “tani i përket popullit britanik” dhe se fokusi i qeverisë do të jetë stabilizimi i biznesit, mbështetja e komuniteteve që varen nga ai dhe ndërtimi i një sektori çeliku më konkurrues, të qëndrueshëm dhe me emetime të reduktuara.

Do të kryhet një vlerësim i pavarur për të përcaktuar nëse do të jepet kompensim për pronarin e mëparshëm, grupin kinez Jingye. Qeveria kishte marrë tashmë kontrollin operativ vitin e kaluar, pasi Jingye kishte paralajmëruar për mundësinë e mbylljes së furrave në Scunthorpe — furrat e fundit në Britani që prodhojnë çelik nga lëndë të papërpunuara. Fabrika, me traditë mbi 130 vjeçare në prodhimin e çelikut, punëson rreth 2,700 punonjës.

Jingye bleu British Steel në vitin 2020 dhe thotë se ka investuar më shumë se 1.2 miliardë paund për të mbajtur fabrikën në punë përballë “çrregullimeve të vazhdueshme të prodhimit”, sipas Associated Press.