BRUKSEL – Pas akteve të vandalizmit, Brukseli ndalon skuterët dhe biçikletat me qira në qendër

– Autoritetet në Bruksel kanë ndaluar përkohësisht përdorimin e skuterëve elektrikë dhe biçikletave me qira në qendër të qytetit, nga frika se mund të dëmtohen ose të digjen gjatë protestave të reja të të rinjve, raportoi agjencia belge e lajmeve “Belga”.

Ndalimi ka hyrë në fuqi sot në mëngjes dhe do të zgjasë deri nesër në mbrëmje.

Vendimi u mor nga zyra e transportit e Brukselit, pasi në internet u publikuan thirrje të reja për organizimin e protestave.

Gjatë protestave të fundit, disa skuterë elektrikë dhe biçikleta me qira u dëmtuan qëllimisht ose u dogjën.

Sipas agjencisë “Belga”, ende nuk dihet se kush qëndron pas thirrjeve të fundit për protesta në Bruksel.

Shumë prej këtyre njoftimeve në internet duket se janë krijuar nga inteligjenca artificiale dhe janë shpërndarë nga llogari me pak ndjekës, të cilat dyshohet se janë llogari automatike, të njohura si bot-e.

Në një tjetër vendim, autoritetet rajonale të Brukselit kanë ndaluar përdorimin e skuterëve elektrikë në disa zona të qytetit.

Ky kufizim është vendosur pas disa rasteve të të shtënave me armë, të lidhura me trafikun e drogës, ku skuterët elektrikë janë përdorur gjatë këtyre ngjarjeve. /