BRUKSEL – Von der Leyen: BE po shqyrton kërkesën e Ukrainës për financimin e mbrojtjes ajrore

BRUKSEL, 2 shtator /ATSH-DPA/- Vendet anëtare të Bashkimit Evropian po shqyrtojnë një kërkesë të re të Ukrainës për financimin e sistemeve të reja të mbrojtjes ajrore, njoftoi sot presidentja e Komisionit Evropian, Ursula von der Leyen.

“Kjo kërkesë kap vlerën e disa miliardë eurove dhe do të mbulonte nevojat e Ukrainës për mbrojtjen ajrore, përfshirë sistemin shumë të avancuar amerikan “PAC-3 Patriot”, tha Von der Leyen në Bruksel, gjatë një deklarate përkrah sekretarit të përgjithshëm të NATO-s, Mark Rutte.

Ajo shtoi se, që nga qershori, 8,5 miliardë euro nga kredia prej 90 miliardë eurosh, e parashikuar për mbështetjen e Ukrainës, janë përcaktuar tashmë për blerjen e dronëve dhe raketave.

Ukraina ka vlerësuar së fundmi se ka nevojë për rreth 300 raketa për interceptimin e objektivave ajrore.

Ministrat e Mbrojtjes dhe të Jashtëm të BE-së diskutuan këtë javë në Irlandë, për mbështetjen e mëtejshme ushtarake për Ukrainën, përfshirë furnizimin e Kievit me raketa për sistemet e mbrojtjes ajrore “Patriot”.

Pas përfundimit të takimit të djeshëm, ku ministrat e Mbrojtjes nuk njoftuan angazhime të reja, shefja e diplomacisë së BE-së, Kaja Kallas, tha sot se ministrat e Jashtëm të vendeve anëtare kishin ndërmarrë angazhime të reja.

Megjithatë, Kallas nuk dha detaje mbi këto angazhime.

“Vendet anëtare që kanë bërë këto njoftime do t’i bëjnë vetë publike ato”, tha ajo. /