BSH: Turizmi dhe remitancat ulin defiçitin e jashtëm në minimum historik

Ekonomia shqiptare ka përmirësuar ndjeshëm bilancin e saj me jashtë gjatë vitit 2025.

Sipas Bankës së Shqipërisë, deficiti i llogarisë korrente u ngushtua me 32.5%, duke zbritur në vetëm 3.6% të Prodhimit të Brendshëm Bruto.

Për të gjithë vitin, niveli i deficitit rezulton më i ulëti historik i regjistruar deri tani. Në bazë të këtij përmirësimi qëndron kryesisht turizmi.

“Ngushtimi i deficitit të llogarisë korrente tregon një përmirësim të mëtejshëm të pozicionit të jashtëm të ekonomisë, i mbështetur nga rritja e fortë e eksporteve të shërbimeve dhe e të ardhurave hyrëse nga puna dhe remitancat. Eksportet e shërbimeve turistike u rritën me 15.1% dhe arritën në 1.3 miliardë euro. Rritja e qëndrueshme dhe disavjeçare e eksporteve të turizmit ka ndikuar në rritjen ekonomike të vendit”, thotë Banka e Shqipërisë.

Nga ana tjetër, importet vijuan të rriten me ritme të qëndrueshme, të nxitura kryesisht nga karburantet, ushqimet dhe shërbimet turistike jashtë vendit.

Megjithatë, ritmi më i shpejtë i eksporteve bëri që deficiti tregtar të ngushtohej.

“Stoku i rezervës valutore arriti në afërsisht 7.3 miliardë euro në fund të vitit 2025. Ky nivel mbulon rreth 7.6 muaj importe mallrash dhe shërbimesh. Raportet vijojnë të qëndrojnë ndjeshëm më lart se nivelet minimale të mjaftueshmërisë së rezervës. Duke siguruar mbrojtje të fortë të ekonomisë së brendshme ndaj goditjeve të mundshme të sektorit të jashtëm”, thotë BSH.

Analiza e Bankës së Shqipërisë tregon se ekonomia po mbështetet gjithnjë e më shumë tek turizmi dhe hyrjet valutore, ndërsa sfida mbetet ruajtja e këtij ritmi edhe përtej sezonit turistik.

Klan News

/tvklan.al