ÇEKI – Parlamenti rrëzon veton e presidentit për reformën e shërbimit civil

PRAGË, 14 tetor /ATSH-DPA/- Parlamenti i Çekisë rrëzoi sot veton e presidentit dhe miratoi reformën e diskutueshme të shërbimit civil, e cila do ta bëjë më të lehtë shkarkimin e punonjësve të administratës shtetërore.

Masa u miratua me 104 vota pro dhe 66 kundër, ndërsa tre deputetë abstenuan.

Presidenti Petr Pavel, i cili kandidoi si i pavarur, ka tentuar të bllokojë nismën e paraqitur nga qeveria e kryeministrit populist të djathtë, Andrej Babiš.

Sipas reformës, nëpunësit civilë do t’u nënshtrohen, në pjesën më të madhe, të njëjtave rregulla të punësimit si punonjësit e tjerë, me disa përjashtime.

Gjithashtu, atyre do t’u hiqet e drejta për të përfituar pagesa të posaçme në rast të përfundimit të marrëdhënies së punës.

Pavel e justifikoi veton duke theksuar se Komisioni Evropian rekomandon mbrojtje më të mirë të punonjësve shtetërorë nga ndikimi politik.

Sipas tij, ligji i ri bën pikërisht të kundërtën, duke i ekspozuar ata më shumë ndaj këtij ndikimi.

Mbështetësit e reformës argumentojnë se ndryshimet do ta bëjnë administratën shtetërore më fleksibël dhe më efikase.

Megjithatë, politikani i opozitës dhe ish-ministri i Brendshëm, Vít Rakušan, paralajmëroi për “pasoja fatale” për funksionimin e shtetit.

“Ajo që po bëni është deformimi i një sistemi që funksionon”, u shpreh ai, duke iu drejtuar deputetëve të shumicës qeverisëse.

Ligji i ri për nëpunësit shtetërorë do të hyjë në fuqi në nëntor.

Çekia qeveriset që prej dhjetorit nga një koalicion i përbërë nga partia ANO e kryeministrit 72-vjeçar Babis dhe dy parti të së djathtës ekstreme të spektrit politik, Liria dhe Demokracia e Drejtpërdrejtë (SPD) dhe Partia e Motoristëve. /