Centre Pompidou zbulon qendrën e re gjigante në Massy: 30.000 metra katrorë për ruajtjen e 150.000 veprave

Centre Pompidou ka zbuluar një qendër të re të madhe në Massy, në periferinë jugore të Parisit, të quajtur Centre Pompidou Francilien – fabrique de l’art, siç njofton The Art Newspaper. Qendra është e fokusuar te konservimi, restaurimi dhe ruajtja, por do të strehojë edhe ekspozita dhe rezidenca artistësh. Ajo ka qenë e hapur për tri fundjava “Prélude!” gjatë këtij muaji, përpara përurimit në mars, ndërsa nevoja për të u bë më urgjente sepse ndërtesa historike e Centre Pompidou në Paris është e mbyllur për rinovim deri në vitin 2030.

Ndërtesa drejtkëndore me tri kate shtrihet në 30.000 metra katrorë: 13.000 metra katrorë janë depo ruajtjeje, 4.000 metra katrorë atelie konservimi e restaurimi, të mbyllura për publikun, dhe rreth 3.000 metra katrorë janë të hapura për vizitorët, prej të cilave 2.200 metra katrorë hapësirë ekspozimi. Ndërtesën e ka projektuar arkitekti Philippe Chiambaretta dhe agjencia e tij pariziene PCA-STREAM: pjesa e përparme me veshje druri bredhi Douglas shikon nga një liqen e një park, shkalla e jashtme i bën homazh shkallës së famshme të Centre Pompidou, ndërsa pjesa e pasme me beton të dyfishtë i mban veprat “si një kasafortë” — Chiambaretta e krahasoi qendrën me një spital ku veprat vijnë e shkojnë.

Koleksioni i Centre Pompidou numëron rreth 150.000 vepra arti modern e bashkëkohor — më shumë se çdo institucion tjetër në Europë dhe i dyti në botë pas Museum of Modern Art në Nju Jork; veprat i përkasin shtetit francez dhe mbahen nga Musée national d’art moderne. Gjatë dy viteve të ardhshme, 645 kamionë do ta transportojnë koleksionin, sot i shpërndarë në tetë hapësira me qira, drejt qendrës së re, ku ka 20 zona të mëdha ruajtjeje. Qendra do të shërbejë edhe për shpërndarjen e rreth 6.000 veprave që Centre Pompidou jep hua çdo vit, falë afërsisë me aeroportin Orly. Drejtoresha Alexia Fabre tha për The Art Newspaper se atelietë janë “një revolucion për ekspertizën e Centre Pompidou”, sepse të gjitha ekipet e restaurimit, kornizimit dhe konservimit do të jenë në të njëjtin vend.

Ekspozita përuruese në mars, “150.000!”, do të fokusohet te historia e koleksionit, blerjet dhe çështjet e konservimit. Biletat kushtojnë 10 euro, ndërsa të reduktuarat 6 euro; ekspozitat janë falas deri në 26 vjeç dhe për punëkërkuesit.

Projekti ka kushtuar 105 milionë euro. Nga këto, 42 milionë euro i dhanë autoritetet lokale — rajoni Île-de-France 20 milionë, departamenti Essonne 10 milionë, qendra kërkimore Paris-Saclay 9 milionë dhe qyteti i Massy 3 milionë — ndërsa pjesën tjetër e financojnë shteti francez dhe Centre Pompidou përmes një huaje me Vinci Construction. Truallin, një ish-fushë futbolli, e dhuroi qyteti i Massy. François Durovray, president i këshillit departamental të Essonne, shkroi në X se zbulimi ishte “një ditë historike për Essonne”.