Certifikohen 18 operatorë të Njësive Speciale të Policisë për mjekësi emergjente

Në Qendrën Klinike Universitare të Kosovës u mbajt ceremonia e ndarjes së certifikatave për 18 operatorë të Njësive Speciale të Policisë së Kosovës, të cilët përfunduan me sukses trajnimin njëmujor “Avancimi i njohurive bazike në mjekësinë emergjente”, siç raporton Klan Kosova.

Trajnimi u realizua në kuadër të bashkëpunimit ndërmjet Policisë së Kosovës dhe Shërbimit Spitalor dhe Klinik Universitar të Kosovës, me qëllim avancimin e njohurive dhe shkathtësive praktike të pjesëtarëve policorë për ofrimin e ndihmës së parë mjekësore në terren dhe reagimin fillestar në situata emergjente, transmeton Klan Kosova.

Përmes këtij trajnimi, pjesëmarrësit fituan njohuri dhe përvojë praktike për përballimin e situatave të ndryshme emergjente shëndetësore, duke kontribuar në ngritjen e kapaciteteve profesionale e operative dhe në mbrojtjen e jetës dhe shëndetit të qytetarëve dhe të pjesëtarëve të Policisë.

Në ceremoninë e certifikimit morën pjesë përfaqësues të menaxhmentit të QKUK-së dhe të Policisë së Kosovës. Kolonel Taibe Canolli dhe Kolonel Mentor Shabani, në emër të Policisë së Kosovës, vlerësuan kontributin e SHSKUK-së dhe në veçanti të Klinikës Emergjente për mbështetjen profesionale në realizimin e trajnimit.

Të dy institucionet riafirmuan gatishmërinë për vazhdimin e bashkëpunimit edhe në të ardhmen, përmes aktiviteteve të përbashkëta që kontribuojnë në ngritjen e vazhdueshme të kapaciteteve profesionale të personelit policor.